上深圳睇傢俬!!!

今日同honey上o左深圳,主要目的都係睇花樽,因為我再唔處理d發霉花,真怕會惹埋其他未發霉o既乾花呢!!!

我o地先去o左深圳藝展中心一期,呢度主要賣家居飾品,好似茶具,花瓶,地顫等!!!花瓶都算幾多,但熟口熟面,因為尋日o係香港花墟都見到,而且價錢同香港差唔多,唔算特別平,而最重要係質素普通!!!當然,要貴o既佢都有,好似水晶花樽同一d設計獨特o既特式花瓶,但價錢一去就去到幾百蚊咁貴...點解無d中價d o既俾我揀o既??結果,我同Honey都係決定番香港買,因為香港中價o既款應該多d!!!!

之後我o地去o左附近o既大型家居店好百年睇傢俬!!!!正如我事前睇o既blog咁講,呢度賣o既傢俱較高檔,好多都好大件好豪華,價錢亦不比香港平,不過除比較大件外,都唔難搵到心頭好!!我同Honey都睇中一d床同衣櫃,只係我o地完全唔知屋企呎寸,都唔知o岩唔o岩,得個睇字!!!

之後我o地去o左隔離o既香江博覽城,上網見好多人都會o係呢度買傢俬,因為價錢平過好百年好多,而且質素同款式同香港大部份小型傢俬店好接近,不過,我同Honey睇完好百年先行呢度,變o左好多o野都睇唔上眼...

行完差唔多五點,其實都係走馬看花,但我o地都已經支力到飛起!!!(唔知點解,我行親傢俬店都好似特別眼訓咁!!)之後我o地打的去福田口岸番香港,途中見到笋崗文具城原來就o係好百年附近,早知行埋啦...唔得,下次要行埋文具城同埋去田貝四路睇埋燈飾先得!!!!!

(後記: 今日行完傢俬店後令我重新提起勁去諗我同honey未來安樂窩o既家居設計呢,睇怕我呢兩日又會瘋狂咁上網參考其他人o既設計呢,哈哈!!)