fc620 ~ 大日子前夕 (19/6 Fri)

婚後快2個月喇!!終於開工打620日誌,不過講真,記憶真係有D模糊,大日子日誌,我估似看圖作文多一點!!哈哈!!

=========================================================

時光倒流番去19/6!!

一早!!Honey拎住奶奶好醒目地再早一日拎定o既奶奶衫,會合我同我爸好順利咁先去太子Wedding Art度拎上船用o既DIY decoration物資,之後就去買做頭飾用o既鮮花,再去尖沙咀羅浮宮再著多次d衫後,就拎住一大個紙袋同兩個大gip過海去萬麗海景酒店喇!!

三箱一早放o係車尾o既紅酒再加今朝拎o既一大堆物資塞滿一車,我同Honey都好慶幸有我爸爸接送,真難想像如果無車坐,我o地將會如何辛苦地將咁多物資搬過海!!多謝爸爸今日特地請假,又唔介意又熱又焗坐係車等我去羅浮宮試衫拎衫!!

多謝你,爸爸!!!!!!

由於爸爸幫忙,我同Honey 4點已經番到尖沙咀,仲有時間去o左H&M shopping!!婚前一日仲可以行街,我諗得我o地係咁!!

Honey呢晚約o左班好朋友飯聚,歡送佢最後一日單身吧??我就自己一個去修甲!!不過...早知就唔修啦,雖然只係$70做法式修甲,但個女仔手勢普通,又磨短晒我特登留o既指甲,我覺得我自己油應該都唔差過佢!!

修甲成個鐘,坐到好眼訓!!買埋銀色指甲貼紙同水晶貼紙,7點幾就番到屋企!!

呢晚係我最後一晚單身同爸媽食晚飯,一切平平淡淡,一如平日,唯一唔同可能係大家o既心情吧!!

忙住執o野預備,不知不覺10點幾!!好彩我屋企不嬲唔著重傳統細節,媽咪都係好簡單幫我用梳梳o左三下頭就搞掂上頭儀式,過程3秒唔使,哈哈!!

沖涼貼指甲貼紙,不知不覺就11點幾!!最後開電腦print埋最最最finalize o既賓客名單!!其實女家一早搞掂o架喇,慢吞吞o既當然係Honey啦!!

一開honey之前一日send o黎個finalized男家點名list,咦,舊o既!!仲要完全唔o岩format,無一d都無將d親友分類,reception點點名???

急Call honey叫佢番o黎搞掂佢,當時佢仲同d朋友歡樂緊,答我話過多個鐘先番!!

過多個鐘先番!!咁即係成1點先上o黎我屋企嗎???做人要識分輕重嘛!!結果,honey都好盡責,飛亡命Van番o黎搞掂個list!!

婚前諗住輕鬆d俾honey去同d兄弟玩,點知佢又差d整個大頭佛出o黎,激死我!!(我煩我惡...係有原因o架,你估又煩又惡我自己覺得好好玩咩!!!)

最後,呢晚我12點幾1點上床,開頭訓得還好,點知4點去完toilet就囉囉戀訓唔番...話唔緊張,原來都係假o既!!