希臘瑞士Honeymoon之旅 ~ Day6: Santorini (1/7)

1/7 (WED): 酒店 -> Perivolos Beach -> Fira ->酒店

第二朝九點先起身,哈哈,其實希臘咁多日都唔係太早起身o者,合晒老公子心意吧!!

呢朝有room service早餐,雖然唔係自助buffet型式,亦無ham無cheese,只有很多很多不同類型o既包,但望住呢個咁靚o既view食早餐,感覺又係好正,連d包都好似特別好味!!

十一點幾十二點就要check-out,本來好想浸多次Jacuzzi,不過原來Jacuzzi到十一點先會開掣,所以後尾我o地都無再浸lu!!

o係Jacuzzi自拍多幾張(其實呢個時候,個腳架已經爛左喇,搞到成個瑞士行程要靠其他人幫手影,d相肉酸好多喇!),之後我o地就要搬喇!!

呢個Jacuzzi,呢個靚view,我要永遠記住!!

同一間hotel住兩晚,一晚係全程最貴,一晚係全程最平!!!哈哈,因為我地今晚住basement,咩view都無!!

其實聽朝7點機就飛,即係清晨5點半就要走,所以今晚特地住只需40euro o既basement!!其實,間房同Jacuzzi房差唔多,toilet仲大o左,而且一樣包早餐送水仲有免費上網,樓上搬樓下又方便,呢間basement,真係又平又抵住!!

Settle down後出發行去Fira坐巴士去沙灘,今日係最後一日o係Santorini,我o地點都要去番個沙灘先對自己有交待,去邊個沙灘好呢?問酒店負責人,佢推介Kamari Beach,話o個邊好多人好熱鬧,仲會有機會見到好多名人明星,而我,事先上網搵到o既就話Perivolos先係當地人口中'The Best Beach in Santorini',個灘靚d少人d,於是,我最後都係揀o左Perivolos Beach!

行去Fira時見到呢個藍頂教堂,好似話好多明信片都係呢度影o架,之不過,呢座教堂無開俾人入去,我o地影唔到咩靚相!!

再o黎環迴180度相!!

老公子企到好高先影到!!

Lunch去o左Fira一間叫Naussa o既餐廳,呢間係酒店負責人極力向我o地推介o既,佢講到呢度價錢抵得o黎好好味,又話好多人排隊,仲叫我o地唔想排隊就唔知幾點至幾點先去!!結果,我地去到喇,但間舖頭無人喎,唔通未係旺季所以少人D??

我o地叫o左三樣o野食,最開心係呢度D包終於係'free' o架喇,至於味道呢,Greek Salad ok la, 不過不失,最好味係個千層麵,但其實真係未至於好似酒店負責人講得咁美味囉!!(可能希臘人口味同我o地唔同吧!)

識跳舞o既驢仔!

o係等巴士去Beach時去o左間文具店睇手信,偷偷地影左D明信片!!左邊張相係1917年o既Santorini,估唔到咁多年前Santorini已經同而家差唔多樣!!右邊係192X年火山島爆發o既相!!

上巴士去到Beach,嘩,個灘好長呀!!雖然比起Super Paradise,呢度無令我'wow'一聲o既感覺,但呢度o既海水好深藍色,俾我一種好深寒o既感覺,而且個海一望無際,可以睇到微彎o既水平線!

落水,又係得我一個,無法子...

呢度d水,好似仲冰凍過Mykonos d水,由於個灘真係唔多人游出海,我照舊唔敢游太出,特別係呢個海,真係好似好深寒!!

一個人游水無無聊,最好玩,當然係潛落水望魚仔!!今次我有泳鏡係身喇,開頭望落去海底,以為無Mykonos咁多魚仔啦,點知原來唔係,只係呢度D魚o既顏色勁似d沙,好難先睇得到,間中仲會見到半隻手掌大細o既魚游過添,其實如果多泳客o係我附近游出D,我諗我都好想游出去,望下有無大魚!!至於呢度D水,都唔係想像中咁清,硬係覺得Mykonos o既清d,可惜我之前無潛過落水感受過呢種清,好後悔,早知冒住無泳鏡海水lar眼都望下個海底啦!!

上水,因為無毛巾,d海水又凍,最好o既乾身方法,當然係曬太陽!!

大大話話五六年無曬黑過,開頭幾日我都仲好保護自己,出入都拎太陽傘,但其實我好懶保搽防曬,無可避免下,已經'慢慢變黑',今日豁出去,立時'立即變黑亦得',得o左!!

大約五點,我o地決定番Fira,諗住襯未日落,去埋個紅沙海灘,點知去到巴士站先望到紅沙海灘d車好疏,疏到兩個鐘先一班車,於是我o地就放棄,直接番Fira行街,買左D手信就慢慢行番Imerovigli!

回程巴士經過另一個黑沙海灘 ~ Perissa Beach

左: 立即變黑亦得o既我!!!! 係咪黑o左好多呢!!
右: 精品店內o既Santorini擺設,D活動驢仔好得意!!

o係Fira行呀行,不知不覺又日落,本來我o地好想行番去尋日Imerovigli o個邊睇日落,但趕唔切,最後o係Fira同Imerovigli中間位置企係度睇,今日呢個日落好清楚好靚,應該係咁多日最靚,不過我o地位置無咁靚,又拎住成手手信,感覺又同尋日坐o係崖邊睇日落好唔同!!

夕陽下o既Fira, 金黃色好靚呀!

日落連環圖!!

再俾多個咸蛋黃大特寫!

夜晚,由於尋晚o既外賣又平又好味,今晚決定encore,不過今晚就要坐o係basement食,無靚view,得番隻獨眼貓咪陪我地!!同酒店負責人寒喧一番後影番張合照,呢兩日真係好多謝佢熱情o既招呼,佢真係好好人,我o地仲學o左句希臘話'多謝'佢呢!!

酒店外貌!

酒店負責人同今晚o既外賣!!

酒店負責人幫我o地call o左第二朝5點半坐的士出機場(20euro),為o左多謝佢呢兩日o既招待,我怱怱寫o左張memo多謝佢!!(後尾先知,我地仲'送'左佢一支Ouzo酒添...因為我o地唔記得拎走,哈哈!!)