希臘瑞士Honeymoon之旅 ~ Day4: Santorini (Oia) (29/6)

29/6 (MON): 酒店 -> Mykonos Old Port -> Santorini (Oia) -> 酒店

八點起身,食埋個豐富早餐後就上酒店接駁車去old port等快船去Santorini!!

一去到碼頭,,成個碼頭都係人,但無船喎,迷惘間已經見到尋日識o個對香港夫婦(Ming & Karen),佢o地一早已經了解過,原來隻船真係未到,所以咁多人係度等!

碼頭堆滿等Flying Cat 3 o既人!!

等到過埋原定開船時間,隻船都未到,不過我個心都唔驚,咁多人等,有問題都大把人陪,哈哈!!

終於船到喇,放好行李入去坐,今次隻船有劃位,好有緣o地,我o地個位竟然正正o係阿Ming同Karen後面,於是三個鐘船程大家又傾傾傾,估唔到可以傾足咁耐,三個鐘船程d時間過得好快,好開心識到佢o地!!

去到Santorini喇,遠望已經感覺到呢個島比Mykonos特別好多,山崖峭壁,地勢好特別,老公子一去到就話呢度好o岩讀geography o既人o黎喎!!

上落船時人頭湧湧!

坐巴士去Fira,巴士要行Zig Zag型o既山路先上到崖上!!

到Fira後再轉巴士到Oia!落車即去Tourist Information Office問酒店位置,職員好nice話我book o個間酒店無reception,話我地要係呢度check-in,真係好彩云云...咁我地以為自己真係好彩啦,就去check-in,點知職員話我book o個間好full,話免費upgrade o左我o地去一間Low season都要125euro o既唔知咩SPA Hotel俾我o地,我o地只要俾番原本酒店o既60euro就OK!!

o係毫無心理準備會遇到呢d case o既情況下,矇矇下,我o地就跟o左個職員去另一間hotel喇!!

去到,check-in手續都做埋先去睇房,UM...間房中規中距啦,一樣有kitchen,仲有露台睇到日落,基於唔識reject,當時又仲係傻傻下咁,就咁就要左間房!!

間房正正常常啦,但始終唔係自己揀,硬係覺得自己俾人搵笨...!!

職員走後,我同老公子坐定定先後悔!!我明明早兩三個月前已經book,full都無理由要我轉嘛,如果我堅持我一定有房!!而且間hotel係自己千揀慢揀book,雖然唔知而家呢間好唔好過自己book o個間,但點都係自己揀先係最鍾意嘛,況且我book o個間係apartment o黎,本來有兩層o架,網上睇有個大kitchen,樓上先係睡房,點都特色過而家呢間!!

越諗越後悔自己咁易俾人搵笨,不過無法子,我o地無膽去嘈,事實已經改變唔到!!

酒店o係正main street,放低行李乜都唔拎就可以周圍行,好輕鬆,亦應該係呢間hotel o既賣點吧!!

WC外都咁靚喎!!!哈哈,我被曬到眼都合埋咁滯!!!

老公子摺起衫袖曬佢白雪雪o既手臂,張相影得老公子好大隻咁!!至於我就剛相反,太陽眼鏡+遮+帽,做足防曬措施!!

Oia main street o既精品舖,圖中o既碟好靚,但都好貴!!

有好多賣手信o既舖頭,但我o地已經o係雅典買左,所以無再行喇!!

呢間屋,我覺得好似黑森林蛋榚!!

我o地又o係無地圖o既情況下亂行,由main street行番去巴士站又食Gyros,食食下,忽然地動山搖左一下!!由於只係震左一下,所以我地都不以為意,但原來兩日後希臘小島Crete發生6級地震,我同老公子後尾諗番,都認為我o地feel到呢一下,好可能係地震前奏呢!!

行去巴士站附近,終於有張相係影到Oia另一邊o既景色!!另一邊無咩白屋,主要係平地,種滿葡萄樹!!

又係Gyros,都唔知食左第幾次喇!!

Market一角,D番茄真係好好味!!!

我地仲買左阿Ming同Karen介紹o既Ouzo,好似話係希臘o既酒,我o地買左支中size,2euro,不過飲o左一啖覺得極之難飲,成陣藥水味,之後溝芬達飲諗住無咁大味,但依然係好難飲!!所以大家要買o黎試,建議買1 euro就OK喇!!! (後來我o地由希臘飛去米蘭,漏o左呢支酒係酒店唔記得拎走...)

食完o野去Market買今晚煮o既o野食,之後番酒店放低晒d o野再出去行同影相!!

上: 呢間Studio show o左好多立體畫!!
左下: 好靚o既手工藝品,但好貴,而且Oia d舖頭大部份唔歡迎人拍照,好似呢張相,我一影完就俾店主話同黑面!!
右下: 一間專賣絲巾o既舖頭,叫The Silk Shop,由於老公子同事order要條真絲絲巾,所以我o地全程主力搵絲巾!!行晒成條Oia Main Street覺得都係呢間最多款,質料又比較好,最重要係店主係個幾斯文o既女人,唔hard sell,有問必答,我o地o係佢舖頭揀左好耐佢都無咩理我o地,毫無騷擾下我o地揀都揀得自在d!!!

最後我o地買o左兩個真絲cushion套同一條真絲絲巾做手信!!

Oia巿o既小白屋,靚,但又係唔係心目中靚到'dump'一聲o既感覺,而且d屋唔係間間都白,間中有D係彩色,總之,同心目中有d差別!!

遠方城堡係睇日落o既熱點!!

呢個轉角位,個人覺得係影Oia巿o既最佳位置!!

番到酒店7點幾,時間唔上唔落,咁早出去同人迫位等睇日落嗎?但酒店露台都睇到喎,而且今日天氣唔多靚,有雲,似乎唔多睇到...於是兩個懶人,最後都係o係酒店露台睇日落算數!!

影下酒店先!!

懶出去,老公子係露台日光浴!!

日落喇!!呢一刻,其實都仲諗緊好唔好衝番出去城堡度睇日落!!

不過好快就唔使諗喇,日落被海面一層厚雲遮住o左,我o地o既Oia日落就係咁...

Oia,日落號稱係全世界最靚o既,不過我o地同佢無咩緣...決定唔出去同人迫,似乎無錯!

煮大餐,落o左好多羅絲粉,飽到要留番聽朝做早餐!!

呢包雪藏海鮮,要7個幾euro!!煮完賣相麻麻,但味度唔錯,最緊要老公子恨左食'殿粉質'好耐,今餐滿足到佢喇!!

至於煮食餐具,sorry,我o地一件都無洗,就當係發洩一下我o地懷疑被搵笨o既情緒!!

食完o野都成十點,難得hotel咁近town center,我o地決定再出去欣賞Oia夜景!!

個人覺得,夜晚o既Oia,比朝早更美!!

路上遊客比朝早少,入黑天氣清涼,周圍行好舒服!!

影極個人都係定唔到咁耐,硬係郁左!!

十一點,舖頭陸續關門,街道開始少燈,係時候番去訓喇!!