2009年8月15日 星期六

希臘瑞士Honeymoon之旅 ~ 希臘總結!!

Honeymoon番o黎都成個月有多喇,終於寫完6日希臘行程,哈哈,瑞士有9日,亦即係話,仲有排寫...


======================================================


六日希臘之旅,o係日日望住咸蛋黃下結束!!



我, 由原本覺得希臘唔係想像中咁靚,覺得一世只去一次就夠,到後來終於被Santorini征服,變為極之唔捨得...


我終於發現,原來希臘小島迷人o既地方,並唔只係愛琴海o既深藍同小白屋,而係日日能夠倚住身邊人,靜靜欣賞日落,感受世界停頓o個種浪漫!! (...咦,寫寫下好似唔知自己寫乜咁添...忽然覺得以上對白有D熟口熟面...好周麗淇...人地櫻紅醉了,咁我呢D就蛋黃醉了啦...)



(唉,番到香港日日番工放工趕頭趕命,我更加掛住希臘時每天日落時份大家停下腳步,靜心欣賞日落o既寫意...)


感性完喇!!!等我將寫o左係第一日雅典o個篇o既總結放番過o黎先!!


衣: 希臘下午真係好曬好熱,入黑後會比較清涼,最好有件風褸旁身!另外,怕曬o既太陽眼鏡同帽係必備外,太陽傘都好重要!!雖然外國人見到你日光日白拎遮可能會向你投以奇異目光,但曬黑事少,雀斑事大,怕曬真係要帶定遮旁身!!

食: Gyros真係幾好味,又唔貴,大大個都幾飽,但男士們可能唔會當佢係一餐,所以我老公子一兩日後開始好'恨'有餐'殿粉質'食...除Gyros外,我仲推介大家試Kebab!!至於dishes方面,Greek Salad雖然唔多合香港人口味,但希臘人餐餐都食,所以點都要試試!!海鮮就麻麻o地喇,唯一比較可取係炸魷魚!!另外,我食過,而又覺得幾OK o既仲有矮瓜,番茄(d番茄真係又甜又大個,超好味!!),千層麵同磨菇奄列!!


水方面,上網知道去Market買一Pack6支水最抵,但我o地開頭唔知邊度有Market,結果捱貴水,盛惠1EURO一支!後尾到Mykonos第二日先第一次入Market買水,點知D水飲唔晒,去到Santorini Shine Hotel兩晚酒店都包o左支大水,結果我o地坐內陸機前都飲唔晒d水,要掉緊兩支!!!總之,係水方面,我o地真係比人買貴好多!


住: In general, 希臘d酒店床無論平貴都係太軟唔好訓,而且唔係間間都有double bed,好多時只係兩張單人床拍埋就算!!


行: 雅典有metro,小島有巴士!!So far我覺得交通都算方便,巴士雖然班次梳,但我坐幾程都算準時,行李又可以放晒係車底,唔使台上台落,其實都唔辛苦!!另外,可能我唔係旺季,雖然希臘人坐巴士唔會排隊,但基本上我o地都上到車,只係o係Mykonos試過一次上唔到車o者!!如果想租車,建議Santorini租,Mykonos除Mykonos town外其餘地方好似都好荒蕪,無咩需要租車遊覽!!


人: 之前上網見好多blog友話D希臘人古古惑惑,食飯送包原來係要收錢,又話係雅典Metro有人偷o野,但好好彩,除食飯送包同唔排隊係無可避免外,我遇到o既希臘人都幾nice,最nice當然係酒店負責人啦!!唯一無咁nice o既可能係Oia d手工藝/精品點,大部份唔係hard sell就係黑面唔俾影相,想做你生意但俾唔到welcome我隨便睇o既感覺,好多時我一入呢D舖就想走!!


手信: 衫褲鞋物,如無必要,還是o係香港買吧!!o個度d衫,MK女人街貨色賣幾十euro...我真係買唔落!!老公子無帶拖鞋去沙灘迫住要o係當地買,普普通通盛惠18euro,肉都赤!!


除磁石貼同Olive Soap外,大家不防買cushion套做手信,放o係屋企sofa上,好sharp,又可以常常remind我諗番起小島美景!!



我o地o係希臘買o既戰利品!!
最上兩個Cushion套o係Oia買,話係全絲o架,10euro,買o左俾兩邊家人做手信!!中間兩個cushion就o係Fira買, 15euro earch, 貴就貴d,但又係話係絲造,最緊要顏色sharp又有小島風景,放係屋企張sofa度真係好醒神!!!


======================================================


好!!總結都寫埋,多謝各位收看!!Honeymoon o既報導係時候停一停喇!!因為...


我估大家應該更想我寫620吧,哈哈!!下一篇一定要寫620先得!!!


6 則留言:

  1. 620 萬歲~
    [SkyBlue回覆08/19/2009 16:33:00]yeah , 萬歲萬歲!!我esdlife度回左你喇!!

    回覆刪除
  2. 第一次睇希臘的遊記, 仲有好多日要寫呢!! 講開住, d 外國人真係鍾意訓軟的床, 係香港人先鍾意訓硬.......外國人唔明點解我地要訓"磚頭".
    [SkyBlue回覆08/19/2009 16:34:00]係呀,仲有好多日...年尾前應該寫得完瑞士吧...哈哈!!係呀,軟床唔好訓呀!!

    回覆刪除
  3. 真係等左你個620 好耐啦 , 快d快d.............
    [SkyBlue回覆08/19/2009 16:35:00]yeah yeah, 久候喇!!!寫左喇,記得留言呀,哈哈!!

    回覆刪除
  4. 粉紅色個真絲cushion好靚呀!!
    支持你~ 620!!
    [SkyBlue回覆08/19/2009 16:35:00]多謝你支持呀!!!哈哈!!

    回覆刪除
  5. santorini 真係好正好正好正... 好想再去, 哈哈~
    [SkyBlue回覆08/19/2009 16:36:00]係呀,我聽我老公子老細講,話佢10年前去Santorini都係咁,無咩改變,所以我諗,等我退休時再去應該都幾浪漫,哈哈!!

    回覆刪除
  6. 好正呀~  多謝你o既分享~~  我9月中honeymoon都去greece呀~  不過只係book哂flight, ferry同酒店, 其他野唔得閒理住, 因為婚禮d野都未搞好~  :p
    [SkyBlue回覆08/19/2009 16:39:00]其實greece都唔太難plan,特別係D小島,其實日日無咩行程先係最寫意,咁先似渡假呀,哈哈!!
    你要努力呀!!

    回覆刪除