9+4

大姐會又有生日派對喇,人數係9+4,9係因為茄雲飛o左,所以差d就齊人!!4,比上次多一人,有進步,特別係今日見到比蒂的大人,大家都呆一呆,只覺好熟口面,但又諗唔到係邊個,好搞笑呢,哈哈!!!距離大姐會聚會變成10+10 o既日子應該不遠吧?好期待,到時一定勁熱鬧!!!!

今晚去O左中環食西餐,不過間餐廳好細,坐得好迫呢!!大姐們不斷吱吱喳喳交換近況,距離上次生日會兩個月,大家又有唔同轉變喇,可喜可賀,希望大家都一切順利!!!Jenny同雞泡仲帶o左佢o地o係台灣影o既相俾我o地睇添呀,好靚,特別鍾意薰衣草園同沙灘景,仲有o個張'神鵰俠侶',十個讚!!!!

食完o野送禮物俾主角CLok,係一個袋同皮帶,希望壽星女鍾意啦!!!

食完飯去飲o野,對住個menu都唔知點咩好呢,結果Honey叫了杯Nothing,好苦呢!!!後o黎又叫o左個心太軟,其實我第一次食呢款甜品咋,好好味呢!!!

十一點幾十二點走,同honey坐地鐵,點知遇到個傻o既,仲要o係度自言自語講晒全香港o既墳場火葬場名,又講咩'唔係老先會死,後生都會死'...係七月呢幾日聽到呢d說話都咪話唔心寒呢!!!後尾佢走去讓座俾個同佢差唔多年紀o既女士,仲大大聲話'後生o既企,老o既坐',激到o個位仲未知佢o係有精神問題o既女士紮紮跳,即刻好嬲咁望住個傻佬!!!!個傻佬之後企o左o係我前面,又要好似企唔穩咁,好驚呀,但我又怕自己未到企離座會刺激到佢喎,所以只敢坐o係度心驚驚,好不容易先到站,即刻衝出車箱,呼~