好运北京第二回~越野賽

三點四十五分,出發!!

今日進行越野賽,o係上水雙魚河舉行,我同Polly四點半入到會場,之後都好快見到我o既teammates,大家齊齊set場,而我同另一位teammate就行去好遠拎golf kart,點知好亂,d車俾人楂走晒,於是我o地白行一趟...加上當時好大雨,場地又多沙泥水tum,所以成腳都係泥水,都幾狼狽...

番到去,我o地等其餘teammates番o黎帶我o地去熟悉一次路線,點知忽然又話有golf kart,於是我o地又行多一次去拎,點知又再一次白行,行到腳仔都軟...不過好彩最後都發現到我o地部golf kart原來已經係我o地PRD房門外,咁都好,總算之後算report唔使行咁遠咁辛苦!!!

時間尚早,我要去楂一次golf kart行熟d地方,哈哈,大家都知我牌齡有幾淺啦,加上只係間中o係自己住o既地方附近楂,所以我今日楂得好似學神咁又慢又窒,行過一d 'bok'位或水tum時好'dun',企o係車後面企位o既teammates唔知有無好驚呢...哈哈...最後我楂番去PRD房附近時,咁橋撞到第二d tech group,好多人睇見我手車都不禁問"Feon,你有無車牌o架?",哈哈,好瘀呀...不過好似帶o黎唔少歡樂俾大家呢...anyway,雖然係楂得衰d,但唔算楂得快呀,哈哈,唔使怕入o黎我屋企附近時撞到我楂車喎...haha...(其實我想澄清少少,呢架golf kart係左呔o架,自問只係倒車唔識睇位,向前行我OK o架...hehehe...)

八點幾,d雨仲係幾大,大家都好疑惑會唔會取消或延遲賽事,好擔心,因為一延遲就代表大家要做多過十二個鐘...不過好彩,最後比賽準時開始,由於無乜report,所以大家都坐o係房門外等(因為呢度房間好細,容納得幾個人咋!),等到個個呆晒,唯有自發地猜o下謎,哈哈!!

等開工!!!

等report其間,忽然有人發現阿旦企o係外面喎,於是大家都出去睇,而旦哥好坐唔坐,竟然坐著我o地架golf kart喎,我o地當然把握機會同佢傾計影相啦,yeah,尋日個個都見到阿旦係得我見唔到,今日終於見到喇,仲影埋相,好開心!!!而後尾呢,又見到林煥光喎,尋日我又錯過o左合照,今日又好彩俾我補影番,yeah!!!

  

阿旦呀,可以二人合照呢,但我竟然未ready好...可惜!!!右為林煥光!!!

大約十點幾十一點,忽然好多report出,於是大家都忙於走o黎走去送report,今日我好勁呀,除press外,我送足十個地方呀,行到腳都軟,雖然天陰落雨,但始終都差唔多中午,都幾熱呢!!!不過由於去得地方多,所以睇到好多o野,好似d馬o既休息地方啦,比賽地方啦,VIP Marquee等等...仲撞番尋日位靚無記新聞報導員添,哈哈!!!

   

d馬o係Mist Tent休息 影番張相留念先!!!

由於尋日一早有人話我知呢個場地環境有幾惡劣,所以我一早著o左一對我唔再著o既涼鞋同短褲,所以我行o左咁多地方,雙腳hum入泥濘都唔怕,只要用水沖一沖腳就OK,比起其他人著住socks 'up'住腳好好多,認真好彩!雖然d泥又濕又軟,但係諗真,無乜幾可有機會咁污漕,所以我早括出去lu!!(遲d後補我成腳泥o既相俾大家睇!)

  

涼鞋短褲,yeah!!                              唔想整污漕波鞋?咁就要用膠袋幫手喇!!

Reports出到點幾兩點,d收件人,觀眾,其他tech team都走晒咁滯都仲送緊呢,最後三點鐘收工去debrief,之後負責人好好咁送o左十一份佢於北京training時買番o黎o既奧運紀念品俾我o地十一位Volunteer,用畫鬼腳形式抽,我抽中一個金色奧運標誌襟章,好靚,多謝呢!!!