先講講background information, 婚紗雜誌"Wedding de luxe"為5月份出版o個期搞o左個"花嫁造型特輯~10個驚艷蛻變之見證"的新娘造型專題,招務十位準新娘為五個國際化妝品品牌做新娘造型,厚面皮o既我無問過honey就交o左相apply o左,結果我被選中,於是成就o左我做一日模特兒了!!!
由於要平日影相,所以今日好曳無番到工(不過我好乖,朝早係屋企都做o左唔少o野!), 大約十二點我就同爸'去旅行'!!
去旅行??因為我爸為o左我帶o左部靚相機,所以'咩'o左個背囊,而且我o地係要由新界北'長征'去柴灣o既studio,前後來回都三個鐘,再加上我o既興奮心情,所以同去旅行無乜分別!!!
咁點解會係阿爸陪我去呢??其實...我都覺阿爸睇我化妝怪怪o地,但係因為要平日影相,所以搵唔到朋友陪我,咁o岩我爸又放假,佢又怕我被人騙,所以就陪我一齊了,不過都幾得意o既,算係難得又特別o既父女節目呢!!!
我o地準時兩點去到,一開門,嘩!!!!!!!!簡直十萬個驚喜,因為開門接我o既竟然係我o係HKU打Netball時認識o既Belle呢!!!!呢個世界真係細,咁都會撞到識人呢,咁耐無見,自然傾番幾句,佢問我幾時婚期,我又問o下佢仲有無打波,而家做緊咩之類啦,原來佢而家做緊呢本雜誌o既Editor呢,勁!!!
一入到去已經見到另一個準新娘set好頭了,而我亦都好快開始set頭,嘻,由於我d頭髮實在太厚,都整o左好耐先疏起晒d頭髮,不過我最鍾意疏起晒見到額頭,簡單整齊,唔錯!!!
疏好頭後化妝師就開始幫我化妝喇,我化o既品牌係Bobbi Brown,化妝師係Bobbi Brown派o黎o既,高高瘦瘦好靚女呢,而且佢好有心機同我化,我特別鍾意佢幫我畫o個條眉,粗粗地,我鍾意,哈哈!!!不過,我黑眼圈實在太嚴重,我見佢不斷幫我補粉去遮...影相就話一打閃光燈就唔覺,但結婚當日d人係見我真人呢,真係好怕變成熊貓新娘呀...唔通我要而家開始晚晚十點上床訓先可以同黑眼圈講byebye???...真係要好好補養o下雙眼呢!!!
化妝加Set頭差唔多個半鐘,坐到我pat pat都有d痛,不過我自己就好鍾意個look,比較earth tone o既feel幾好!!!!好喇,搞掂好晒後佢o地就為我戴上Swarovski頭冠,頸鏈同耳環,好搞笑,佢o地幫我戴皇冠時哼起香港小姐首歌呢!!!
Set好頭未化妝,係咪好pale呢??? 上妝中........
後面o個個就係阿Belle喇!!! 完成喇,OK嗎???
終於去影相喇,影相位置放滿反光板同發泡膠板,好得意,好似困住我咁,而今次影相係要影埋膊頭o既,係攝影師指導下我擺o左兩個pose,主要係要突出鎖骨,好似好sexy咁!!!影影影,大約影o左十張吧,攝影師一聲'搞掂',嘩,咁快就影完喇喎,都估唔到呢!!!我即刻衝去望望最後一張相,佢o地個個都話影得我似張曼玉,我一望,嘩!!!!!我o黎o架?????自己都唔認得自己(化妝品o既威力真勁!!)...又真係有d似張曼玉呢...(咁大個人從來無諗過自己似張曼玉!!!)
我被困o係反光板中,好得意呢!!! "唔好笑"、"特出d鎖骨"...係咪好sexy呢??
正面照!!!大家覺得點呢?
影完相,化妝師、頭髮造型師同其他工作人員都好熱情,收o左幾張卡片,真係無諗過影相可以咁開心,而且最重要就係一圓以前發o既model夢,今日認真收獲豐富呢!!!!
而家真係好期待五月號快d出呀,唔知登上雜誌張相係點o既呢???
P.S. 忽然諗起,今日我竟然無同我爸影合照,不孝也...點解咁都唔記得...不過真係好多謝我爸陪我山長水遠出去,仲做埋我攝影師,睇住我化妝應該都悶吧...真係要多謝爸爸!!!!
沒有留言:
張貼留言