美貌與智慧

睇金像獎見到徐子珊得到新人獎,由於本人無睇過該電影,所以不敢講佢係咪真係演得咁好,之但係,佢o個番答謝說話真係夠晒大方得體,我唔理佢係咪事先背定,但至少我聽唔出佢係背,因為實在講得好流利,好好聽,令我深深咁覺得佢係近年少有o既智慧型美女!!!!

其實我仲好記得佢當選港姐o個陣我覺得佢係自郭羡妮後最靚o既港姐,而且我仲記得佢本身做Marketing,當選後接受無線新聞訪問時對答已經好大方得體,應對能力極高,絕唔似一個新加入演藝界o既人,所以令我有深印像!!!(大家以後都可以留意o下佢做訪問o既即場應對,真係好大方得體o架!)

及後,佢因為大膽o係電台講性而惹是非,拍無線劇學警出更又肥腫難分,剪短頭髮扮男人婆,極唔討好,我媽媽都因此好討厭佢,之但係,我反而覺得佢有膽色,試問一個香港小姐點會有咁o既勇氣去做一個粗魯男人婆??更況且,佢呢個男人婆其實係演得唔差,如果唔係都唔會令人以為徐子珊真人都係咁粗魯吧??

呢一兩年,佢終於回覆選美時o既靚靚身段,仲記得曾經睇show見到佢同馬俊偉跳拉丁舞,扭動蛇腰好吸引,身型fit到漏,連我係女仔都覺得佢好正,而更特別o既係,原來佢最擅長o既舞步,竟然係hip-hop,真係估佢唔到,好型呢!!!!!

總之,其實我都幾欣賞徐子珊呢個人,大美貌有智慧,仲要有膽色,而家佢拎o左新人獎,前途無恨吧???我仲記得當時有朋友都話睇o左套戲後一定會對徐子珊改觀o架,而家搞到我都有少少興趣想睇番佢套戲添呢!!