我倆的第一次...婚照拍攝之旅

奧運倒數一百天的今天,我要同Honey完成一個任務,就係拍攝我倆人生第一次婚照,成個任務過程充滿歡樂同意想不到o既驚喜,我會用我一輩子去記住這美好的一天!!!!

日期: 2008年4月30日 (奧運倒數100天)

時間: 0600 (起床)
           0730-0945 (於Sarona Studio整'妝'待'髮')
           0945-2230 (正式拍攝時間)
           0015 (番到屋企)

人物: 我同Honey (算係主角吧,哈哈!!)
           Michael Law (Photographer) & Jody (Assistant)
           Sarona (Wedding & Evening Couture and Accessories Designer)
           Will & Rita (Make up & Hair Stylist)
           仲有Terry (司機,唔肯定佢個名,唔好意思,不過佢好好人,係少見o既斯文司機)
           簽我o地入去U Hall的表弟 (撞住你d Hallmates 食飯,唔好意思呢!哈哈!)
           同埋o黎探班o既Belle同Sally (上次影雜誌撞番同認識o既)

地點: 廸欣湖 => 馬灣 => 赤柱 => 香港大學大學堂 => 中環

任務: 為Sarona當模特兒影婚照外景相版,拍攝'最美'的結婚照片

 

上妝中                   Sarona的貓女好似好鍾意我Honey,爬入Honey懷中訓覺呢!!!

 

我的手臂好大隻呢!!!!                            塊面係咪黑過個身好多呢?仲有d寒背...

好看嗎?

P.S. 我o地部相機只拍o左以上幾張相咋,睇住先啦!!

o係天時、地利、人和之下,任務順利完成,等我報告一下先!!!

天氣:
今日簡直天公造美,雖然未至於見到籃天,下午四五點開始有少少天陰陰,仲曾經落出幾滴雨,但整體天氣比預計中好好多,朝早有段時間,太陽更猛烈到將我肩膊曬紅(傷)了呢!!其實太好太陽反而仲無咁好,因為今日有段時間太曬,我Honey隻眼得番一條線,睜唔大呢,哈哈!!至於溫度方面亦剛好,連我一向怕熱的Honey著住禮服都無流大汗,Very Good!!

拍攝景點: 1/2

去o左五個地方,每個地方都各有特色!!!

 

最驚喜: 馬灣,因為可以拍攝的景點較多,有舊村,碼頭,水上高架屋,好靚o既籬芭等,成個地方好有味道(仲有咸魚同曬緊o既海鹽味),加上o係馬灣拍照時陽光係最好o既,相信d相應該會好靚!!!!

 

最想去: U Hall!!雖然都係HKU地方,但唔係人人都有機會入到去影相,幸好我Honey表弟住o係呢座古蹟入面,所以我o地先可以入到去,睇見攝影師Michael入到去影到唔捨得走咁,可想而知入面幾靚,唯一可惜係去到U Hall已經日落,陽光唔多足,希望影出o黎又有另一番味道啦!!!

 

最期待: 中環夜景!!唔使多講,呢度係最能表現香港國際大都會感覺o既地方,而且平時要影夜景真係無番咁上o下器材同技術都好難影得靚,所以我同Honey都好期待中環夜景o既相!!!

 

最童話: 當然係廸欣湖啦!!!粉藍加白色o既小屋同湖境,個感覺真係好似去o左童話世界咁,呢度絕對係五個景點中最有純潔感o既地方,唔知我同Honey似唔似公主同王子呢,哈哈!!!

 

最渡假Feel: 應該係赤柱吧!!其實相對其餘四地,我自己覺得赤柱比較普通,而且呢度比較多遊客,我同Honey都成為景點,不難發現有人偷影我o地,甚至圍觀,都有少少尷尬!!!另外,o係巿政大樓對出一棵樹剛好開滿淡黃色o既小花,樹冠好大好靚,好有驚喜!!!!

化妝+髮型:
化妝師Will (http://hk.myblog.yahoo.com/willwillmakeup)係專業化妝師,成日幫大大小小明星模特兒化妝,所以絕對有信心,不過我番屋企睇番自己相機的幾張花絮相,覺得我塊面化得黑過頸同身,唔知係咪特登o既呢?而且,下午o係室外轉妝後我都無正式望過自己咩樣,哈哈,因為呢d未知之數,所以扣起半朵花!!!!至於Rita,上次影雜誌相佢幫我set o個個頭我已經好鍾意,佢亦都知道我唔適合有頭髮遮住額頭,所以幾個髮型我都係見額o既,good!!!!不過最後一個髮型為顯出Wild o既感覺,有少少亂,而且我都係唔知道自己呢個髮型係咩樣,所以都係扣起半朵花,嘻!!!另外,Honey一d妝都唔需要化,哈哈,佢心入面一定大呼甩難,因為佢最怕化妝品/護膚品呢,哈哈!!

婚紗晚裝:
掂呀,好鍾意Sarona (http://hk.myblog.yahoo.com/saronastudio)o既衫,特別係兩件晚裝,試衫時我已經好鍾意,一件露腿一件露背,好高貴好靚,聽落都正吧,哈哈,而且顏色亦係我較鍾意o既深色,對比起影相期間遇到o既其他準新人,明顯我d衫係高貴d sharp d靚d o架!!!婚紗方面有大拖尾,相信影相出o黎一定好靚o者,總之就係好鍾意啦!!!不過,原先有諗過係四件衫o架,但因為實在無咁多時間換,結果都係三件,無得著多件靚衫添!!!至於Honey,佢o既禮服係最簡單o既,唔會好似出面咁配晒閃邊閃背心,當拍攝其間遇上其他新人時真係高下立見,Honey的打扮真係特別高貴有台型o架!!!

攝影:
未睇到成品,所以暫時四粒先啦!!!攝影師Michael同佢助手Jody成日都好落力,周不時影到訓晒地,身水身汗,好勤力,而且好仔細咁留意光暗位,Good!!!!不過Michael比較少教我o地擺pose,影足全日,pose離唔開A,B,C,我同honey當然唔知點擺pose先好嘛,所以o係少指示下,唔知d相變化會唔會唔夠多呢!!!!

自己:
自問狀態幾fit,皮膚滑滑得額頭一兩點小粒粒,算係咁,黑眼圈亦唔太勁,因為尋晚出奇地無因為太緊張而失眠,雖然早起,但依然精神飽滿,再加上努力食少d o既成果,比起過年時高峰至少輕o左六磅,有番少少腰(雖然不嬲都無乜!),good!!!! 而且,雖然係每月生理上最唔fit的一天,但我的自動亢奮功能發揮得好好,影到不知時間咁滯,到夜晚還是精神奕奕,勁!!!唯一唔太好o既係手臂依然強勁,仲係好大隻,同埋我竟然有d寒背,成日要人提我廷直個身,再加上唔識擺pose,扣少少分!!!另外,由於著住成日高跟鞋,雙腳痛到飛起,特別係影相尾聲去到蘭桂坊上斜時,我差唔多行唔郁,行得好慢,若果我可以健步如飛,應該可以爭取影多幾張靚相呢!!!!

Honey:  x 1000
Sarona大讚我Honey笑容無我講得咁生硬,仲笑得幾好睇,表現令人有驚喜,雖然當中有段時間佢明顯影到悶有d遊雲,但一向對影相無乜興趣o既Honey能夠應付全日攝影活動真係好叻,抵讚!!!! 最後,Honey俾o左一個大驚喜我,令我感動萬分,我當然要偏心d,俾番一萬朵花花Honey啦,哈哈!!!

其他:
一早預備帶去o既公仔都無上到鏡,因為唔夠時間,但係Michael本身都預備o左幾樣道具,Colorful得o黎應該都幾搶鏡,哈哈!!!另外,雖然火炬今日到港,o係廸欣湖同馬灣附近見到好多警車,但交通好順,Good!!!!

總括o黎講,成個影相過程雖然好支力,但全靠各位勞苦功高o既工作人員配合,令成個拍攝能夠順利進行,同工作人員傾開計,原來佢o地都有為今日o既拍攝而感到緊張,就連司機Terry都話唔知點解有少少失眠,可想而知大家幾重視今日,我實在覺得好感動,真係真心感激大家o既厚愛,好感謝大家!!!!最後,希望Sarona、Will同Michael都滿意我同Honey呢兩位'模特兒'吧,而家,真係好想快d睇到相呢!!!!