揀婚紗相

影完結婚相都有成個月喇,尋日終於去揀相,好期待呀,唔知d相影成點呢?

放工出尖沙咀,由於我早過honey,所以我去到月台無上車,特登等多幾班車dum時間,上車喇,打俾honey,哈,原來佢同我坐緊同一架火車喎,不過一個係第五卡一個係尾卡,見唔到添,哈哈!!!

我o地食完靚靚車仔麵後行去山林道,好大雨呀,哈,做乜次次上去Sarona o個度都落大雨咁o既!!

呢日得Sarona同攝影師Michael o係度,由於知道揀相要用好多時間,所以我同honey都唔得閒同佢o地慢慢傾就開始揀相!!!

我o地要o係四百張相入面揀(最肉酸o個d Michael已經揀走晒,因為我估計埋試機相,當日影足十個鐘都應該有成六至七百張相呢!),都有d花多眼亂,所以我o地先由頭到尾快scan一次,有個concept先,之後再籂選!第一輪我o地揀o左一百張鬆d,揀走o左好多,因為有唔少都係一個靚另一個唔靚,再唔係就兩個都麻麻,得個景靚...明明記得當日有d景都影o左好耐,但估唔到最後都揀唔到相,都有少少可惜!!!

Anyway,揀剩o既都真係幾靚,我o地進行第二輪籂選時,我成日都忍唔住大叫'呢張好靚',哈哈!!!呢次籂選主要係針對背景,有時兩三張都係差唔多背景,所以就三揀一或三揀二,最後揀剩八十二張相!!

好,最後一次scanning喇,先數一數kiss相有幾多,因為四百幾張入面都有唔少係kiss,我o地都怕唔覺唔覺揀o左過多,好彩honey嚴格籂選下,原來唔太多!!!之後再數單人,好正常地,我o既單人相比honey多,但其實我無偏心o架,有好幾張我都覺得honey好型,但honey自己唔鍾意,自己話唔揀...噢,明明我覺得好型o架,可惜!!!

好,決定要呢八十二張!!!由於我o地package只包五十張相,所以加多o左少少錢,不過揀剩呢d都真係唔錯,我同honey都覺得好值!!!

揀完相其實已經十一點半,揀o左三個鐘多d(噢,我o地係咪揀得太耐?),大家都好支力,真係打搞晒同辛苦晒Michael同Sarona o係度等我o地呢!!!而家,我o地要等Michael再執d相,因為我當日太曬,下午換衫後好多相都影到我膊頭o既紅印,同埋有d手臂位太好肉,而我同honey就要再諗o下如果真係幫襯佢o地整相簿o既話會揀邊d相,所以要再搵時間上去傾!!!

十二點幾終於走得,好支力呀,揀相實在太用神喇,好想即刻番到屋企,點知天雨路滑,吐露港發生車禍塞車喎,等等等...終於行得,點知行唔夠一陣又塞過,原來前面又撞o左另一架車...搞o下搞o下,點半先番到屋企呀,沖完涼兩點,真係好支力呢!!!!

==============================================================

今朝六點幾醒o左,個腦太興奮(大家都知我天生一副急性子!!),不斷盤算自己o係出面整相簿係咪抵d之類,搞到訓唔番,'典'o左好耐無端端電話響嘈醒,原來已經十點,都唔知自己幾時訓番著,不過就好似無訓過咁...好眼訓!!!

今日黑雨紅雨黃雨,我無出街叫o左honey上我屋企,我o地一齊睇相,睇o下朋友o既、blog友o既同婚紗攝影公司o既(特別係我o地打算幫襯o個間深圳公司!),我同honey都好滿意自己呢一輯,而且不得不讚係Michael o既攝影技術、Will o既化妝技術同Sarona o既服裝設計品味,我o地真係深深咁覺得d相出o黎o既感覺同style都係我o地所期待o既...um...應該話佢o地所喜歡o既,正正係我o地喜歡o既,可以咁夾,真係好開心!!!

對於成個揀相過程中,我有以下感覺:

1. Honey原來要求好高!!Honey一見佢覺得唔好o既相就會即'out',決定得好爽快,當然,揀得太耐揀到悶係原因之一,但另一方面亦睇得出佢要求嚴格!!!不過honey揀相o既著眼點同我有少少唔同,佢就著重整體感覺同構圖多一d,我就睇人多一d,有時張相一個靚另一個唔靚,honey好快決定out,而我o係呢個時候就會話'o下...但我/你影得靚喎...'!!!所以,揀相揀o左三個鐘其實真係要多得honey o既決斷,哈哈,如果換轉得我一個揀,我一定揀得仲耐同揀多好多相呢!!

2. 我原來好貪心同多心!!諗番轉頭,揀o既相入面有一兩張其實可以唔要,而無揀到o既,我又有一兩張相揀番,心大心細,但回想番當初唔揀o既理由,又好似好o岩...哈哈,似乎揀相我一定唔可以一個人去,如果唔係一定破財,哈哈!!

3. 攝影: !!先前我o係我倆的第一次...婚照拍攝之旅一篇俾o左4朵,而家要改番做5朵,因為d相真係影得好靚好靚,唔怪之得Michael o係esdlife入面咁受歡迎,咁多人搵佢影婚宴相!!唯有要改善o既就係我o地笑到支力,硬o左,佢應該引我o地笑番,咁d相一定仲靚!!

4. 化妝及髮型:1/2!!先前4朵,因為我o個日真係唔知自己咩樣,而家睇相,終於睇到喇,個妝好好,只少我唔會覺得化o左妝後我唔似'我',而且完全睇唔出我有大細眼問題,十個讚!!晚妝方面,係個頭亂少少,扣少少分,而個妝就艷o左少少,有d似鬼婆,哈哈!!

5. 服裝:!!其實先前都滿分o架喇,今次睇相更加覺得perfect!!關於Sarona o既衫有幾正我唔再多講喇,今次呢五分係俾honey o既衫同鞋!!之前我一向以為皮鞋係黑色就得,唔使買新,因為影相會唔覺,但今次睇相,我要改變我呢種觀念,因為d相係會影到honey對新鞋有幾光鮮亮麗o架,新鞋d皮'令立立'd,成個look都高貴d呢,哈!至於honey夜晚件花裇衫就真係無買錯,同我件藍色晚裝幾襯,good!!!

6. 拍攝景點: 先前我講過我比較鍾意馬灣,比較無咁鍾意赤柱,最後揀出o黎o既相真係馬灣最多,但赤柱亦只係比馬灣少一張,都有d估唔到!!至於本來最期待o既中環夜景反而無想像中咁靚!!至於U Hall就好正,影出o黎好似去o左古堡咁,而且仲好有驚喜,因為我o地直到睇相先知原來Michael影緊一棵樹,棵樹令相o既構圖好宏偉,真係好有驚喜呢!!

7. 我: 大家都知我o係好急o既情況下決定影呢輯相,雖然已經好積極減肥,但唔少相都仲係見到我對粗手臂,特別係上身,硬係覺得壯o左d...um...自從影完呢輯相我就放肆o左,食番多o左o野,肥番少少,似乎又係時候努力減肥喇,如果唔係下輯相又會肥o都o都呢!!

8. 人像: 今次o既相半身近鏡唔太多,大頭更可以話無,由於我同honey一向打算影多一輯,所以都有idea下次要點影,希望令兩輯相各有特式,擁有晒我同honey想要o既理想風格!!

最後,真係要再一次多謝Sarona, Will同Michael,輯相真係好靚好靚,我同honey都好滿意,希望你o地都同樣滿意呢輯相版,多謝你o地呢!!!

P.S. 講o左咁耐,d相呢?都知大家心急,但d相要遲d先俾到大家睇,大家再等等啦!!