去土瓜灣睇傢俬

尋日同honey屋企人飲完茶之後帶o左佢o地上新屋睇,今日就到honey陪我屋企人食飯,之後我同佢兩個出去土瓜灣睇傢俬舖!!!

出到去兩點幾,由歐化做起點,其實只係睇o左四五間咋,但眨o下眼六點,時間過得真快,仲諗住沿路行去食牛肉麵添!!!

講番d傢俬,由於之前係沙田睇歐化覺得好靚,所以今日去總店睇!!!係就係好靚,但價錢仲靚(最頂層有張床係連住個projector screen o架,成個私人影院咁,盛惠八萬八,睇到我嘩嘩聲!!),睇怕以後都唔使再睇...!!之後睇o左幾間望落幾grand o既舖,有一間個sales猛sell佢o地d貨幾高級,又吸音又防塵,仲有氣壓'教',子母扣同埋雙門'教'...聽落真係好似好細心咁,我同honey都學o左唔少o野!!!

再之後有一間一入去個sales又係猛sell,但d對白同之前o個間一樣咁,但就感覺好唔老實,仲話咩今日俾錢先可以hold住優惠,一聽就知係黑店啦,即走!!!

另外又有一間個職員好designer feel,開頭問佢o野佢好似唔想答,cool cool地,但答多兩句又好似幾pro咁,我o地走時仲無拎卡片,佢又好似無意識要留客做生意,好難得!!

最後,我同honey又入o左一間,間o野d design都幾靚,好鍾意佢個飾櫃,個designer係後生仔,好o岩傾,所以就坐低俾我o地floor plan佢睇,佢俾o左好多意見,我同honey都多o左idea點整間屋,走o既時候後生仔又無hard sell,感覺好好!!

番到屋企,仲諗住上網search過間o野係ok就會考慮o下搵番後生仔,點知上blog同esdlife一search,原來間o野係黑店...!!應該話,我今日睇過除cool designer o個間外o既都係黑店!!!!之後我o係網度睇o左好耐,似乎十間造傢俬九間都係黑店咁,好似好難搵到好o既傢俬舖,似乎呢樣o野係我未來一大挑戰喇...真係麻煩呢!!!