早睡早起

尋晚睇星期日檔案講小朋友應該早睡早起,話香港小朋友好夜訓,平均比外國小朋友訓遲同訓少成個鐘,令小朋友第二朝番學無精神,學o野都慢d,成績又差d,仲好易脾氣暴燥添!!

我生長自一個有好好管教小朋友早訓覺o既家庭(我同我細佬妹小時時期係睇完八點半娛樂新聞眼就要訓o架!),對於早訓,我都幾執著(因為我幾夜訓都係咁早起!),如果第二時有小朋友,相信我都會迫佢o地早訓!!

不過,迫還迫,我覺得身教最重要!!睇見節目入面有個阿媽十二點幾一點叫個女訓個女喊到拆天,我就覺得係個媽教得唔好,唔關小朋友事!!咪話我話,平時一定係阿媽叫個女訓o既同時自己仲繼續夜麻麻睇電視,小鬼見你有得夜晚玩自己就要訓,唔喊唔扭計就奇!!

就算大人唔可能早訓,都要令小朋友唔知你'唔訓係度玩'!!好似我細個咁,因為係同細佬妹一齊入房訓,有伴一齊玩公仔,跟本就唔會理爸媽係咪仲睇緊電視劇,三個玩到支力就自自然然訓,爸媽完全唔使鬧!!相反,而家d小朋友多數獨生,入房得一個人咁無聊,話咁易俾大人係廳o既聲音吸引,訓唔著不足為奇,衝出房唔肯訓亦好正常!!

總之都係一句,早睡早起身體好啦!!