同未來奶奶睇金器

今日下午同未來奶奶去睇o左陣奶奶衫,仲睇埋金器!!其實我個人o黎講,覺得咩款都無所謂,因為對金鐲一生人只係戴出門o個一陣,不過未來99叫到,所以都要去試!!

我o地去o左周生生試,其實金鐲o既款唔算太多,一望就知邊d款老套邊d唔老套!!我左手試o左一隻八錢再加一隻六錢o既,而右手就試一隻一兩五錢o既,因為未來99之前听sales講,話一樣咁重,戴兩隻好似多d,不過,今日一試,發覺完全唔係咁,而係好明顯地,一隻一兩五o既得體好多!!!

之後我honey同我honey妹都到o左,而我o地就再去另一間大d o既周生生試,呢間因為大d,所以款又多少少!!試完金鐲,再睇金頸鏈,估唔到遇到'叮'一聲o既金鏈!!我一戴上頸,honey同未來99都話好靚,而我自己都覺得的確幾靚,仲一定襯到晚裝添!!Sales話頸鏈唔同手鐲,賣o左後未必有貨番,不過我o地都覺得我仲有大半年先嫁,雖然呢條金項鏈真係好靚,但可能遲d金價會再跌,又或者見到其他更靚呢,所以我o地都係先有個印像,遲d再慢慢睇!!

另外,今日同媽咪行過吉之島見到好多床單做緊折,其中見到有款都幾靚o架,有d紅色心心,但又唔係成張紅當當,唔錯!!其實我對於龍鳳被舖無乜研究,我媽話佢嫁時都唔係訓成張紅當當o既,只係一張新床單再加塊紅色毯係面就得,所以佢都覺我唔使買大紅被舖,費事只訓得一頭半個月後就唔再訓!!!

媽咪無所謂,咁差未來99!!!下午同佢睇金時襯機問埋,佢都話佢當年都無訓呢d大紅被舖,而且佢都好讚成我應該買d第二時用得番o既款!!!!Yeah!!!好開心我媽同未來99都唔係咩傳統人家,我又煩少樣o野喇,哈哈,買自己鍾意o既床單就得,有少少紅,吉吉利利就OK,yeah!!!

P.S. 睇開金,honey忍唔住問點解鑽石有人戴出街,但大大條金鏈就算好似我o地今日睇到o個條又靚又時尚o既都唔會有人戴出街...???