中文金曲

今朝一家五口去o左飲茶,之後同Honey出沙田行o下街,好快就到夜晚喇,好happy,因為今晚我有得去中文金曲,仲要坐Row 1呢!!!

由於我手上三張飛都係免費,所以全部單丁位,其中兩張相隔一條走廊,另一張就係台o既另一邊,好頭都怕搵唔到friend去要埋第三張飛,好彩翔唔介意肯去呢!!!

入到場,哦~原來Row 1實際上係第五行,不過都好前,睇得好清楚,雖然絕大部份時間都係睇d明星背面,但都可以正面咁遠望坐係台邊o既明星,仲坐係一班基仔fans前,氣氛都算一流呢!!!

等到前面兩個坐位的人來到時,我同honey即刻建議對方調位坐,咁就可以前後坐而唔使分開一條走廊坐,就o係呢個時候,我發現眼前呢位仁兄好眼熟,掙扎o左好耐,最終都鼓起勇氣問佢係咪我認識o既恩記師弟,結果原來佢都o係度掙扎問唔問我係咪feonko,哈哈,好開心見番佢,畢業後大家都無聯絡,只係由我爸口中得知佢近況咋(我爸同佢伯父係同事!),原來佢下星期會番恩記實習呀,佢仲諗住約Miss Cheung同我一齊食番餐飯呢!!!

講番今晚,成晚節目都幾豐富,唯一係覺得見o黎見去都係o個幾個歌手,而commercial break時,大會都安排o左唔少以前o既中文金曲經典片段睇,都幾好!!最令我印像深刻係佢播番譚校長宣佈唔再領獎,相信當年fans聽到一定好震憾!!另外,其中有段片有哥哥出現,現場即刻勁多人拍手,似乎好多人都好懷念哥哥呢!!!

左上: 綜觀全場,唔使審,一定係劉華Fans最人強馬壯啦!!!(另外,出奇地周筆暢都有唔少fans,秋官都有兩行fans o架!)
右上: 草蜢呀,今晚傑仔好型仔呀,好鍾意佢呢個髮型,我下星期約定你o地係紅館再見面!!!
左下: 用相機zoom埋去d歌手度,但完來第三張飛係坐係班歌手附近,勁近,翔就好啦,可以咁近睇住d明星,留意佢o地一舉一動!!!!
右下: 基仔拎傳媒大獎時fans o既尖叫聲大到令我耳仔都聾呢!!哈!!

以上就係我今晚影到o既相!!其中容祖兒,華仔同Eason都有行過o黎我呢邊,好近呢!!!

左至右,上至下:

1: 會場!
2:鄭融對鞋好鬼高呢!!不過無可否認,佢條小蠻腰真係好幼呢!
3:場內咁多歌手,除華仔外,基仔都算最靚仔喇!!
4: 祖兒,佢條裙幾靚呢!
5: Eason,佢一唱歌,d基仔fans即係收晒d牌坐定定唔出聲喎!!
6: 泳兒,佢件衫好似lolita...感覺好似旺角o個d...好唔掂!
7:光良,現場聽又唔覺佢唱得好,把聲有少少雞仔聲,幾怪!
8: 筆筆,佢d fans坐o左係唔同角落,留意左上角的簡體'筆'營光牌,好搞笑!
9: 側田,好細粒...
10:  Twins,成晚只係覺得阿嬌個打扮好特別,掛住望佢我都唔記得望阿Sa
11: 劉華,勁近呢,不過佢咁短頭髮無咁靚仔!
12: 克勤,成晚都係覺得佢唱歌最掂檔!!聽出耳油!!
13: 張敬軒,官仔骨骨,唔錯!
14: 王宛之,山頂有一兩個fans大叫Ivana呢!!
15: 秋官出場全場氣氛最熱烈,有dancer有煙火,果然勁'秋'!!
16: 陳慧嫻,終於搵到個矮過鄭融o既人喇,可能佢對鞋唔夠鄭融高...佢唱o個首歌都幾好聽呀,不過我諗極都諗唔起首歌叫咩名,有無人話我知!!
17: 蔡琴,我無影佢相呢,見佢出場我第一時間諗佢o個個係咪假髮...
18:千嬅,佢都有唔少fans坐係基仔fans後面,有埋poster添,但全晚都好靜好乖,無乜出聲!!!