=================================================
夜晚Honey個電腦唔知做乜,skype又上唔到,咪又用唔到,仲要電話都無電,搞到傾唔到計,唔制呀!!!
2007年2月27日 星期二
2007年2月25日 星期日
豪
打完波十一點幾,由於要等其他同事係又一城等位飲茶,所以朝早有去做運動o既就先上一名公司前高層(剛離職!!)屋企拜年!!!!!呢位高層住o係九龍塘畢架山,豪宅即係豪宅,,歐陸式裝修、水晶燈、高級音響、世界各地旅行買回來o既擺設(e.g. 南非駝鳥蛋)、四房(可能仲有工人房,不過我無行入廚房參觀!)兩廳同露台(種滿好多大牡丹)、落地玻璃(可望到維港煙花!!),氣派認真不凡呢!!!(P.S. 今次係我第二次去豪宅,記得上次係去完新疆後去o左其中一個團友位於寶馬山o既屋企睇相,上次o個度夜景超靚,但裝修無咁'豪宅'!)
除o左屋主一家四口外,去拜年的分別係我、我老細、老細老婆(身懷八個月BB女!)同朋友,以及另一位同事(身懷八個月孖仔!)及佢老公,參觀完豪宅後,男o既一堆女o既一堆咁傾計...我呢個年齡組別o既得我一人,唯有自已搵節目,簡中就同六年級o既屋主大仔玩迷你搖控直升機,簡中又同屋主養o既可愛狗狗玩,不過最後都係埋了女人堆聽幸福準媽媽及媽媽(豪宅女主人)的生仔經...雖然我明顯地撘唔上咀,但聽住佢o地講照4D相(可以睇到BB樣!)、BB郁動令個肚變型(孖仔媽媽話佢個肚試過由圓變方,起角位置應該係BB手手腳腳,哈哈!)、買BB用品、坐月、孕婦奶粉、餵人奶、收奶、前二後八及BB出世後朝早俾奶奶湊 o既安排等等,又幾有趣,感覺到準媽媽們o既幸福!!!!
終於去飲茶喇,成圍十四人,由於太迫,所以先到o既同事留了個'正'位俾我,就係坐係兩位成座山咁又高又大(肚腩!)o既男同事中間,因為佢話得我先'攝'到入去...成餐飯都好有'壓迫感'呢!!!!哈...
==========================================
番到屋企三點半,之後'迫'honey陪我去拎相,其間見到有個兩歲BB扭計,喊住要雙手拎滿o野o既媽媽抱,媽媽於是蹲下半溫柔咁話'想點呀,媽媽無手呀!',我仲估個BB會死扭咁狂喊啦(而家個個細路都超野蠻,好恐怖!),點知個BB仔竟然雙手抱住媽媽個頭咀對咀咁鍚媽咪,仲要鍚o左兩次,看在我呢個途人眼裡都覺得好冧,跟何況係媽咪,不過個媽媽真係無手,所以都係企番起身,當時我已經行遠,只聽到個BB又喊了聲...估唔到人仔細細咁有計仔,識用軟攻攻陷媽媽個心,唔係一味野蠻無理,俾我係媽媽都一定心都溶呢!!!!
2007年2月21日 星期三
2007年2月20日 星期二
按摩
上到羅湖,先去按摩,因為有coupon,所以既做足底又做中式按摩,仲食埋dinner添,估唔到味道都唔錯,,之後honey仲教我桌球,不過我學o左一陣咋,其實仲想打埋乒乓波,但有對父子打緊,結果無打到!!!最後埋單,但由於honey俾o左太多貼士,所以coupon只夠俾貼示咋,賣單比預算貴了少少,但我o地竟然留o左超過五個鐘,都抵o既!!honey都話簡中去o下都唔錯呢!!!
夜晚本來諗住買林海峰個talk show 睇,點知仲未有...最衰仲要夜晚上唔到網,不過好彩honey帶o左d台灣資料o黎睇,所以時間都好易過!!!
==============================================
今日下午番到屋企,嗚...諗起五日假期快結束喇,聽日就要開工大吉,希望放假前充滿未知之數o既工作可以輕輕鬆鬆咁完成啦!!!
==============================================
今日原來係特別日子,忽然諗起明年一定要慶祝八年八個月八日,點知honey提醒,原來我o地剛錯過了七年七月七日...噢...睇番日記,原來當日我o地無見面,我去o左玩Wii,之前一日就一齊去睇中文金曲,唔知當晚我o地有無過埋十二點先番屋企呢...
2007年2月19日 星期一
2007年2月17日 星期六
豬籮!!
大約十二點去到舅父屋企,差唔多二十人齊齊開大餐食魚翅年糕盆菜,不過d表弟妹掛住玩唔幫手食,所以真係食到好飽,不過我都飲o左三碗翅,因為d翅真係落足料,聽聞我舅父煮o左六個幾鐘o架!!
食完o野陪班小朋友玩,小三o既表妹無意中爆晒佢爸媽公公o既年齡秘密我知...哈哈,小朋友真係守唔住秘密o架,唔怪得我媽以前都唔俾我知佢乜生肖啦!!!
夜晚番到屋企簡簡單單食個杯麵消滯,之後邊睇花車巡遊(我都望唔到邊個係我妹,都係估估o下咋!)邊跟我爸學玩Bridge,好難學,成日唔識記出o左咩牌...最後都係玩o左鋤大2,我運氣好好,仲第一次有同花順呢(印象中我好似未試過!!)!!!
2007年2月16日 星期五
賣懶、賣懶、賣到年卅晚!!
打開家中雪櫃,全部都係糕呀!!!!
中層:年糕
下層:左一芋頭糕、右一馬蹄糕
wow,總共七種唔同味o既糕呀,睇怕過o左呢個假,食晒呢d糕,我諗我都會由狗仔變做肥豬仔lu!!!唔知食o左個超巨形蘋果(我爸公司同事唔知係邊買o既)可唔可以消消滯呢!!!
=============================================
13:36
Honey今日去踼波,少有地話我知可以去睇,嘩,我成N年無睇過honey踼波,不如就俾個驚喜honey啦,我仲帶埋相機添,不過呢場'賀歲波'honey無入過波呀!!!
睇完波之後同honey出o左尖沙咀,本來想去食日本o野,點知年三十唔開,改去食一間樓上新加坡菜,又平又坐得好,唔錯喎!!!之後就去海港城shopping,目標係我上星期睇到有特價o既牛仔褲!!行o左好耐,終於搵到間舖,試完都好鍾意條褲,但...點解無減價o既???我記得上次睇好似係$400半價,即$200,但而家係正價$298...諗諗o下,無可能同一間舖但唔同地方唔同價嘛,況且牛仔褲不嬲都好少減價,更何況做半價咁多,我諗我上星期應該係眼花將'98'睇成'00'...雖然無平,但我都係買o左,人人年三十掃特價貨,我就買正價貨...
另外,我仲係LCX路中心o既攤檔睇中隻紫色eye shadow,但佢賣晒,而家好後悔,因為我唔記得睇佢乜牌子...只記得賣$60,有無人呢幾日行開幫我睇o下佢係乜牌子,等我之後可以搵番隻色...
===================================================
夜晚係沙田美心食團年飯,表妹化粧了,另一個表弟亦由以前BB女仔聲變了老牛聲了,不經不覺佢o地都大個仔大個女了!!...而十歲表弟玩game時講o左句英文粗話...唉...
===================================================
十二點,爆竹一聲除舊歲!!!!!我家窗外的廟立時變得煙火通明,'pik lik pak la'好不熱鬧!!
好忙呢!!!
下午三點幾四點,忽然又有另一個task要我做,仲要下星期五deadline...最重要係我要等另一個同事做好我先可以做,充滿未知之數,噢賣葛!!無可奈何下唯有帶埋d file番屋企研究啦,嗚...
放假都要帶住呢個'忙錄'o既感覺,真係慘呢!!!
===================================================
夜晚番到屋企赫見一家五口齊晒人食飯,尋晚我媽仲話得番三個,所以叫o左我爸買乳鴿咕嚕肉加食送,呢餐一家五口團年飯(聽日同親友團年!)認真豐足呢!!!
2007年2月14日 星期三
鬼節
今日少有地唔係星期五都同同事們出去食lunch,終於去o左聽o左佢o地講成半年但我都未去過o既茶餐廳,個辣肉醬炆米又真係幾好味!!加上難得無打的,lunch只係$32,破我入職後最低lunch銷費記錄!!!
下午六點放工,奇怪地office都無乜人早走,似乎無乜節目,再加上今日成日office都無女士收到花,連朱古力都無出現過,所以無乜氣氛!!!
番到屋企附近七點幾,先同honey去o左麥記坐,因為book o左九點,口痕痕仲食o左個餐,哈,又研究o左陣各大旅行社o既自由行package,坐到八點先走!!!本來都諗住順便辦年貨送禮,點知想買o既o野原來唔再出,忽然失o左預算添呢!!
大約九點到達意大利餐廳,其實我雖然住附近,但從未去過o架,都係睇openrice食評話唔錯先諗住試o下!!!去到門口已經好多人,好彩我honey上星期已經打去book,所以我o地個位都唔錯,唯一美中不足係我o地個位對住冷氣口,所以好凍,d食物都好快凍晒呢!!!
2007年2月13日 星期二
2007年2月12日 星期一
2007年2月11日 星期日
籃球女將
我大約九點九出到九龍塘,先去足球場,同事們自八點半已經開始踼波,我到o左後就轉戰籃球場!!!由於我身為女仔人家肯去打波,所以佢o地都'以為'我好勁,問我係咪校隊,更有同事踼完波原先要走,但都特登去籃球場望望我'乜料',哈哈!!!
鬥波喇,我猜到隊實力勁d o既,半場四打四!!由於得我一個女仔,所以我每次拎住波佢o地都唔敢埋我身,俾晒位我起手射,不過其間有個阿叔同我o地一齊打,由於佢唔係同事,所以對我好唔客氣,有時嚇到我要蹲下雙手抱頭保護自己呢!!!
成場波我射入好多球,同事們都'嘩嘩聲',或者佢o地估唔到我女仔竟然用單手射波,仲要力水唔細...(佢o地唔知我中學時可是兩屆推鉛球亞軍,手臂老鼠仔唔細o架!)!除叫我'女中雄傑'外,仲叫我唔好'讓'佢o地,好搞笑!!!不過成場最開心就係我guard到幾個ball,其中有幾次走位仲被人讚走得靚,yeah!!!
而我自己都覺得今日狀態唔錯,多年來都唔算退步太多,打多幾次應該可以回復狀態,真有少少'寶刀未老'o既feel...忽然好懷念中四同好友Percy每周六/日兩家人係街鬥波o既日子呢!!
打完波十一點半,之後坐車番屋企同屋企人食lunch,下午係屋企大掃除,而家屋企好乾淨,今日認真充實...不過聽日我應該會支力到唔郁得喇,哈!!!
2007年2月10日 星期六
2007年2月8日 星期四
2007年2月7日 星期三
喜愛feonko's blog的人同時都愛看...
以下就係睇我個blog o既人同時會睇o既blog:
...八八卦卦走去我訂閱o既blog度睇人o地個list,點知個個都係以上四篇blog!!!咁樣,係咪代表睇我blog o既同時都會睇我訂閱o既blog,定係以上四個blog實在太多人睇,差唔多每個yahoo blogger都會睇...所以人人都係以上四個blog list...如果係後者,咁呢欄新o野咪無意思囉...????
===============================================
夜晚打爛o左一支我幾鍾意o既指甲油,係支銀色閃粉,而且都幾大支,所以整到成地成手都係閃粉,都唔知點先可以抹乾淨個地板...過兩日大掃除要諗諗辨法先得...
2007年2月4日 星期日
夢
今朝忽然又好唔想番工(Monday Syndrome),聽日六合彩中o左就好,不禁幻想中o左就可以唔使做,又或者同老細request做一世developer,咁就無pressure又有工作,唔使攸手好閒無建樹...
今日係office無乜o野做,夢唯有不斷咁發...好辛苦呢!!
=================================================
今日我仲好掛住前晚個show...掛到不得了...點算好...草蜢葯d葯力好勁,食o左廿年,中毒太深...!!!我有幸睇o左尾場,原來草蜢三子個靚股只在第三場先有得睇,當時睇到全場嘩聲四起呢!!
另外,演唱會超時要罰超過六萬,都怪個show實在太正,搞到我o地唔捨得走呢!!不過相信草蜢見反映咁熱烈,罰款都抵啦!
=================================================
夜晚同壽星女Rebec通電話祝佢生日快樂,順便傾o下佢睇邊場演唱會,Rebec,三年後草蜢再開concert我o地可以再一齊去,哈哈!!!
訂閱：
文章 (Atom)