選場地心得

搞掂場地呢一項後,一直想寫番篇心得,因為我知道揀場係搞婚禮入面最先要決定,亦係最最最煩心o既事,未有場地,其他婚禮項目就好似無o左目標咁無法開始,而且吉日得一個,理想o既場地如果無自己吉日真係會好唔開心,所以搵場地期間就好似同其他人鬥快咁,真係會心急同精神緊張到日夜都諗住o架,所以,我都希望我o既經驗可以幫到其他預備搞婚禮o既準新人,唔好好似我咁落錯訂搞出個大頭佛!!!

第一步: 預計圍數同定Budget!!

聽落好似好簡單咁,但其實唔係咁易,因為圍數方面,好多時都要先問父母先決定到,好似我有朋友,佢親朋戚友每人問佢要五圍十圍,加加埋埋變o左好多圍,Budget控制方面亦難好多,好容易out budget!!!如果圍數少,咁Budget方面就易控制點,擺酒店或酒樓悉隨尊便!!

第二步: 搜集資料篩選適合場地!!

酒席價錢好多都可以上網搵到,如果搵唔到,大家不防send email去問,最重要要問o既五點:

1. Minimum charge
2. 目標大日子o既Availability
3. 酒席menu
4. Floor plan (睇多唔多柱位)
5. 場地可容納圍數

跟據經驗,大部份酒店都覆得好快,而且一個 mass email就可以send去好多場地問,所有資料係手就可以好快篩走d無自己大日子,又超過budget o既場地了!!!

另外,價錢以外,食評同服務質素都好重要,網上討論區有好多有用資料,用d時間追post去了解每一個場地真係有必要o架,唔係千揀萬揀揀o左個唔好o既場就無謂了!!!

第三步: 睇場!!

酒樓方面易d,就咁Walk-in就OK,唔使約時間,只要搵個星期六/日一次過行晒油尖旺o既靚場都唔係難事,只要你事先上網搜集好想睇o既場地地址就OK!!!至於酒店方面就麻煩d,可能太多人約睇場,好多時預先一至兩星期預約先約到sales,若果約唔到但又唔想出咁多次睇場,其實都可以試試walk-in,不過就唔係間間都俾你咁做,我都碰過唔少壁!!

另外,睇場時記得要帶相機,因為好多時轉頭就會唔記得個場咩樣o架喇!!!仲要記住留意:

1. 場地空間感 (我個人覺得四四方方o既場地好過長條型!)
2. 有無柱位
3. 樓底高度
4. 新娘房大小 (印像中,逸東酒店的新娘房認真小得可憐...)
5. 新娘房有無獨立洗手間 (如果係酒樓,呢點好重要,因為酒樓toilet通常較濕滑,好易整污漕件衫)
6. 賓客洗手間衛生 (酒樓Toilet衛生太差的確會失禮賓客o架!)
7. 麻雀台位置 (有d場地有獨立麻雀房,有d就無,要留意會唔會開席前搬台)
8. 有無Pre-function area (有d賓客太早到,如果有pre-function area俾人坐下會好d)

雖然睇場係好浪費時間,但係亦好重要,因為只有同場地工作人員直接接觸先知邊度最o岩feel呢!!

第四步: 落訂!!

揀好場地當然就盡快落訂喇,慢一步可能就會無o左自己心愛日子,到時就頭痕!!!落訂前當然要搵sales'講數'啦,事先記得參考網上面其他新人可以bargain 到d咩,亦要參考o下其實場地酒席o既package普遍包含o既項目,咁同sales bargain時就可以爭取到更多喇!!

希望以上小小心得可以幫到其他打算結婚o既朋友啦!!