正版

又發惡夢喇,半夜嚇醒後,朝早個夢再o黎一個大爆炸,驚醒一刻發覺自己耳邊真的聽見巨響,身體仲被爆炸O既威力震到不由自主地搖動...當下嚇到都唔記得分辨是夢境定真實,只諗到如果聽見大門外真的有人大叫'走難',我就要奪門而出...

下午,本來大忙人honey唔得閒見我,幸好佢老細番唔切o黎搵佢開會,所以可以見他一見,食個下午茶、係商場走一圈,仲奉上我倆第一次...,能夠令我踏出零的突破,當然係草蜢啦,兩次concert都咁正,點都要買番o黎紀念,而且1CD+4DVD,都算抵呢!!

yeah,番一日工後又放一日假,希望honey唔使同老細開會,可以陪我就好喇!!

我的小模特兒

今日一家五口去o左沙田食泰寮, 好耐無去過喇,好好味!!下午番到屋企,忽然興起同媽媽去o左彩虹買甜品,特別推介我媽買我同Honey都好鍾意o既糖癡豆,嘻,今晚有口福喇,yeah!!

==================================================

下午忽然想幫我的寶貝麥嘜仔影相,其實去完台灣後,麥嘜仔o既寫真已經成為我手機、屋企同公司電腦o既wallpaper喇,實在太可愛喇,所以好想幫佢係屋企影d相!!本來我想影窗外o既景色o架,但今日有煙霞影遠景唔多靚,環顧屋企,又好似無乜p野可以做背景...

...吖,就影呢個啦!!!!

 

"咦?呢度係咩地方呀,黑白黑白咁o既,每踏一步仲有聲o喎,好好聽呀!!"

 幾經辛苦,我終於搵到一部o岩size o既鋼琴仔同迷你鋼琴書俾我o既寶貝彈了!!!

do re me fa so...你o地聽o下,係咪彈得好好聽呢,果然叻仔!!

壁球

Menu說得沒錯,做完運動出身汗後,成個人都有'精神爽利'o既感覺,專心追住個波,打中'好o野',打唔中'哎也',咩煩事霉事悶事都唔得閒再諗起!!!!

今日星期五,office氣氛又變得輕鬆起來,同事們o既笑話其實已經令我心情好番少少,至少個人無咁呆,仲識笑到標眼水!!!夜晚入黃埔打壁球,真失禮,我咁大個人今次只係第二次打咋,對上一次已經係中四同pat pat去choir個camp時玩喇,所以我對壁球可以話係零知識,只係記得印像中個拍同個波都好重,打到手都斷,哈!!

o係'教練'May o既指導下,我同Agnes由本來波都唔識開,到後來勉強來回到四五球(見笑了...!!),都算進步o左,我o地好努力咁追住個波,打唔夠半個鐘已經流晒汗,估唔到運動量咁大,要減肥o既話,打壁球似乎幾有用呢!!!

不過呢,我諗我真係要好好學o下Agnes同May o既手勢,記緊揮拍時要成隻手向後拉先得!!!因為我今日打壁球用o左平時打羽毛球o既手勢,用o左腕力,要知壁球比羽毛球重N倍,我咁打好易扭親,好似今日打o左幾個反手波,手腕向內一屈,壁球拍柄就撞落自己手腕,當場紅了一片...都幾痛呀,聽日實瘀梗!!下星期番工都要順便請教一下同事打羽毛球的手勢,希望我平時無打壞手勢啦!!!

我o地打o左個半鐘,打到個個都面色紅潤,為o左保持新陳代謝率,我o地好有雄心壯志咁話要keep住打,仲即時book埋下星期o既場添呢!!!!實在太好喇,o係公司羽毛球活動o既沒落後,我的壁球運動要興起喇,為健康又好,減肥又好,都係一件開心好事,加油呀!!!

多謝Agnes同May帶我去打波呀,嘻,我今日好開心呢!!!!

掛住你呀!!!

老公,呢幾日同你傾得好少計計呀,我好掛住你呢...尋日成日傾得夜晚o個幾句咋...好慘慘...我臨訓send o左個乖乖SMS俾你,今朝起身又唔見你回呀,番公司又等唔到你電話,打俾你又唔通,有d唔開心呀,好想快d搵到老公...

好彩老公下午打俾我咋,問o左老公尋晚幾點訓,今晚番邊之類,下午我做o野都好似精神少少呢,證明老公俾到能量我,嘻!!!

老公,你有無掛住我呀???

失落

不知何故,呢兩日有d失落感,但又講唔出原因,唔通又到o左我o既depression period??仲記得以前讀書考試,每幾個月就會有兩三星期o既失落期,o係呢段期間我滿腦子只有'唔想做' o既諗法(對住honey開口埋口都係呢句,o係呢段時期o既我都應該幾煩!!),咩精神、鬥志、自信都無,做乜都提唔起勁,笑容亦少!!!

自從U grad 後,失落期 o既period短o左,'番發' o既頻密度都好似少o左...對上一次'番發'好似係上年九十月,仲記得o個排我日記成日都以'悶'為題才呢...呢幾日明明公事繁忙,照理應該唔得閒悶嘛...點解硬係有d失落呢????

...um...呢幾日我係屋企連網都懶得上喇,十一點幾就呼呼入睡lu...

早睡

尋日同honey去食豬排麵,食完好滯好辛苦,開始唔鍾意食喇,實在食得太多,呢d咁肥o既o野都係簡中食少d食先會令人心思思o架!!!

下午同honey一齊睇DVD,林狗個talk show真係第一輯好睇d呢,呢輯有少少悶,無乜高潮位,只係留意到佢不停講o野講足兩個鐘好勁...至於最好笑都係尾段,可惜我事前係報紙已經大約知道呢段內容,所以驚喜久奉,如果事前唔知應該會笑得更大聲!!!

今晚睇o左新聞透視,講睡眠,又令我諗起cognitive science...夜晚同honey傾電話,傾到十一點就不知不覺訓o左lu,符合晒新聞透視所講,十一點至七點係最好o既睡眠時間!!!

==========================================

今日同屋企人出o左沙田,介紹o左佢o地去食印尼o野,佢o地都大讚好味,嘻!!!之後行街,其實我好耐無出沙田o架喇,不過新城巿同西田好似裝修極都仲未裝好咁,圍晒板都唔係太有心機行呢!!!

是晚都好早訓,未夠十二點呢!!

勞作

今日雖然有兩個新task assign o左俾我,但我今日成日都無乜做過o野呢!!!

今日lunch大大老細請,去o左鴻星飲茶,由於老細每星期都幫襯,所以佢點o左好多佢鍾意o既點心,又的確幾好味,仲叫o左蟹粉小籠包,好多汁呀,一咬就漏出o黎,好彩無彈到個身o者!!!

食完飯去買卡,因為我同事上星期生了對孖仔呀,聽日諗住派代表送禮物(係部IP webcam,好貴,但好彩好多人夾!!),於是去o左timesqure page 1對面間o野揀啦,一睇就見到一張for twins o既卡幾得意,有兩件立體衫仔係封面,咁咪買囉!!!同事俾完錢,出o黎叫我o地估張卡幾錢...都估到係貴o架喇,但斷估最多咪四十幾五十...點知...嘩,有無搞錯呢,張卡仔細細,入面空白一片,竟然要$85???????????嚇到大家都呆o左!!!!

由於夾錢o既有廿幾人,為免傳o黎傳去簽名(要傳o既話就要去埋中環...),所以老細交俾我搞掂,我即話我d字唔靚,唔肯寫,點知佢o地話佢o地d字仲衰...番到office,對住張$85 o既卡,要我寫d核突字上去真係好大壓力呀,仲大壓力過做公司o野!!!好彩有一兩位同事不經意o既建意,利用我公司電腦僅有o既字體同小畫家,努力剪剪貼貼下,終於令空白o既卡仔貼滿o野,畫面豐富好多,同事們都大讚...

但其實我覺得仲係好肉酸o架,因為成個office又無color print又無顏色筆,word o既字體又唔夠我屋企多,又無photoshop俾我edit d圖,仲要我呢排上唔到網,搵唔到d靚圖...所以成張卡黑、灰、白,都唔係太吉利...

 

anyway,久未做勞作下,我已經利用office僅有o既資源盡力而為了,不知不覺整o左兩個鐘,整o既時候其實都好怕同事們會怪我花太多時間係'非公事'上...哈哈...,好彩同事們今日都好似特別relax(趕完尋日o既project!),所以大家都好似好得閒咁成日吹水,吹到用影印機印立體o野,我竟然信影印機識focus...噢...太好笑喇...

臨走,同事竟然話我新買個靚袋太貴...無可能o既...可惡!!!!

嘻嘻哈哈就一天,今日好輕鬆,不過我就要拎o野番屋企做了...星期一有o野要趕...哈哈...

(同事用手機拍下我的傑作,希望快d send俾我,等我可以share俾大家睇啦!!!!)

=========================================

夜晚食飯,爸爸讚我呢...嘻,搞到我有少少心花怒放...多謝!!

OT

又要為工事開OT了(其實都唔太夜),不過今次慘在我其實無乜o野做,只係幫手執user guide,但user guide係需要等多有o野ready先做得...本來同事們都諗住等埋我o架,但最後都先走一步,好彩我都追到佢o地一齊落樓咋,不過都係有少少被遺棄o既感覺,好似好慘咁!!!走o既時候同事一句無心話令我對號入座,乜早放工就等於不忠精咩??

放工一個人撘車,本來honey都差多時間放工,點知佢唔肯搵我一 齊番屋企呀,搞到我更覺孤拎拎呢...

番到屋企,收到PM o既電話,原來份user guide出了少少,但頗為敏感o既錯誤,雖然PM負責最後check份user guide,但始終係我唔小心先呢,嗚...好唔開心添...

之後,到我細佬叫我幫佢check grammar...好彩後尾唔使...

...不過連串煩事令我心情好差呢...

RSS

由於公司無得上網實在好唔方便,於是尋晚特登學用RSS Reader,希望可以用佢將所有想睇o既o野save低帶番公司睇,當在少少娛樂!!!

其實RSS Reader係一個可以將所有來自不同地方o既新更新文章(e.g.新聞,Blog)集合一齊睇o既reader,有o左佢,用家就唔使續個網頁click去睇,節省時間!!我今朝起身上網,只要o係個reader度click 'Get',咁所有新更新內容就會feed晒落reader,我跟住只要save o左display o個版內容落卡,番公司就有得睇今日o既新聞同朋友o既blog!!!

可惜原來呢個reader唔可以feed晒所有內容,好似新聞就只有擇要(可能係yahoo news只有擇要提供啦,我諗我要spend d時間搵搵有無新聞網可以feed晒所有新聞內容!),詳細內容係雖網先可以retrieve到,不過唔緊要啦,對於無得上網o既我o黎講,好過無了!不過我諗今晚要add多d o野入個reader睇先得,因為d新聞擇要好快就睇完喇,哈哈!!

===============================================

噢,朋友有另一個更好出路...噢...又無得約friend食lunch了...

不過都要講聲恭喜先得!!!! ^.^

悶

撞鬼,今日兩位同事放病假,我呢邊位好靜,做o野做到悶想傾一兩句計都唔得,最衰仲係我仲未有得上網,想check email又唔得,睇新聞又唔得,真係除o左工作,還是只有工作,好可憐呢!!!!!

================================================

Yeah!終於有friend係我公司附近番工,一定要約食飯先得(我恨o左好耐可以約friend食lunch o架喇!!!)!!

百萬行

Yeah,今日去百萬行,咁大個女第一次參與呢個大型慈善活動,都幾興奮!!一早起身同honey去食粥做早餐,之後坐車去荃灣再坐西鐵入屯門兆康站集合(我第一次坐西鐵咋!)!!去到兆康站勁多人呢,於是走去附近一個商場去toilet,竟然撞到同事喎,可惜太多人等Toilet,都無時間詳談!!

今日原來有成三萬人參加,好多人呀,不過跌序好好,而且我o地一行十人成程都唔使等,好快就上到巴士,好順利!!起行喇,今日都幾熱同幾曬呢,等我仲著o左中袖衫同帶cap帽,早知學rebec咁帶太陽鏡好過,唔使頂帽焗住個頭咁熱!!

我o地邊行呢條深港西通道邊睇風景,可惜今日空氣好差,煙霞好勁,只可以隱約見到蛇口,不過左右兩邊有漁排同蠔田,景色特別,都吸引o左唔少人走出橋邊影相,當有工作人員趕人入番步行區時,唔少行人大叫'走鬼'提水,好搞笑!!除o左影相,chris d friend仲同我同jenny玩'估職業'遊戲,都幾搞笑,而rebec就同bobo越行越快,眨o下眼唔見o左,哈哈!!

行畢全程,時間剛好兩個鐘,其實都唔係太辛苦,不過唔知點解對波鞋刮到我腳踝甩皮,都幾痛呢,但我明明去台灣著足四日都無事o架!!我o地之後上o左Cindy屋企玩Wii,不過打唔夠一陣就變o左睇相傾計,食埋cindy個愛心木糠布甸就走喇,因為Jenny要趕去接機,好彩佢提我可以o係元朗買老婆餅咋,難得去到咁遠都好應該買番d地道美食番屋企做手信呢,哈哈!!!

夜晚番到屋企好支力呀,一照鏡,原來都曬黑o左呢,特別係肩頸位置紅紅咁,好唔想曬黑呀!!之後好快咁沖涼陪媽媽一齊睇金像獎,城城又得唔到影帝,好可惜呢,但睇見劉青雲拎獎多謝老婆,又幾感人!!成晚其實我最想睇就係宋慧喬,但佢出得一陣鏡,仲要俾支咪遮住塊面,睇唔清佢個靚樣呀,而大小S今晚都好sharp好搶鏡,至於林嘉欣同Isabella個咀太紅喇,個妝麻麻呢!!

飲茶

今日同honey去o左飲茶,兩個人邊睇雜誌邊歎茶,好自在!!之後又周圍行街,本來我睇中o左一件衫,自己覺得唔錯,差d想買,但honey話唔好,所以我唯有忍手唔買,信佢一次,不過及後我仲係對件衫念念不忘,好想第二日帶我媽o黎睇等佢俾意見!!

之後再行行o下,我o地見到另一間舖又有o個件衫喎,似乎件衫都幾多色,買o左出街似乎都幾易撞(旺角衫!!!)呢,真係慶幸我有聽honey勸,無買到件衫!!其實honey一向d taste都比我好,對於我買o既衫,佢同我媽o既意見好多時都不約而同地幾一至添...似乎我應該信多d我呢兩位型像顧問o既意見先得,哈哈!!!

手信

今日約o左Agnes同May出o黎,因為再唔見,我d手信過期就唔好食喇!!!我o地七點幾去到尖沙咀,由於無book位,於是係店外等o左超耐,腳仔都軟!!!終於有得坐喇,呢間西餐我都食過幾次,都真係唔錯o架,不過今日我o地叫o左兩個差唔多o既飯同意粉,下次要叫好d先得!!!

食完飯傾計,哈哈,忽然被提起中五o既風光史,嘩...已經N年前o既時lu,只係曾經風光,而家大家咪一樣'坐'o係度...之後又講起補習,估唔到may到而家仲不斷有幫人補習,好勤力!!雖然收入真係唔錯,但我自從入U補過一次後都懶得再去補lu,因為真係一樣好煩o既事(雖然我已經唔見得會prepare!!)!!!之後又講起名牌,當然唔少得提起我知道o既例子...真不得不認自己老同out喇,有粒星o既波鞋同有個大M o既牛仔褲,只知自己曾係雜誌見過,但恕我有眼不識泰山,我真係叫唔出係咩牌子,大M字褲隻牌子我仲要聽o左幾次都記唔到點讀...老了...哈...

=================================================

13/4

復活節假後我同另一同事部電腦一直都上唔番網囉,聽聞要等大老闆approve先以上番,真係慘...想check個email都唔得,幸好呢排忙到飛起(我有份做development o既project wor o左呀,做system design o既猛話大鑊呀,我之後實有排做喇...),唯有專心工作!!!不過呢幾日太忙喇,隻眼無離開過mon,開始覺得右眼視力好似有少少問題,我懷疑係有少少散光呀,死火...而且呢幾晚我兩點先訓呀,黑眼圈大到...嗚...

我同事的一對孖仔出世了,成個office忽然多o左喜氣洋洋o既氣氛!!!唔知一對孖仔似唔似樣呢!!

安排欠妥當!!

今晚去o左in義工,去之前去o左city super買專for著高跟鞋/平低鞋o既襪,其實之前去旺角都買o左對5蚊雞o既,但著落發現突晒出o黎,好肉酸,之後o係雜誌見city super有得賣,雖然貴十倍,但我都買o左,之後仲即著,因為今日對高跟鞋著到我好痛呢!!!

去o左長沙灣interview,由於地點隔涉,所以我預早o左,原本八點十五分到邊o左七點四十五分到...點知填完o野坐個幾鐘都仲未有得in,個工作人員又唔出聲交代,搞到我等o左半個鐘後忍唔住問佢...結果等了又等,九點七、八個字終於有得in...由於係group in,仲要用晒三種語言,所以一in又個幾鐘,離開時已經十一點咁滯喇...雖然自問今晚表現都OK,但感覺真好似浪費o左好多時間咁...

無謂介懷

要返回現實,返回工作剛位喇!!!番到公司,當然急不及待分享自己o既旅行經啦,可惜同事見到我'聲稱'為我見到中最大一棵花時,竟換o黎'呢棵已經係最大喇?' o既回應,搞到我down down地添...而另一個去日本o既同事就剛剛遇正櫻花盛放,真係好似d相咁成條路都係花...好羡慕...雙重打擊下忽然令我懷疑自己浪費兩天上山係咪好不智...

悶悶不樂o左一陣,諗諗o下,我做乜要咁介意呢,見唔到最靚咪下次再去睇囉,而且我又唔係乜花都見唔到,無理由因為其他人o既comment而令自己覺得自己個trip唔夠好嘛,本來就係兩個人o既trip,總之我o地玩得開心就夠!!!...哈哈,諗通o左即刻又精神番晒!!!

哎唷! Back to normal!!!

8/4

好o野,同honey出街!!!先去o左極之好食車仔麵,呢間車仔麵雖然係貴少少,但真係好味,點知而家執淨一間咋,我爸聽聞屋企附近開o左間,不過我同honey搵過又唔見喎,如果開o左都唔錯,咁就唔使出旺角食呢!!!

之後去o左瓊華,本來睇中一件褸仔,但honey企o左出去,問唔到佢意見,而個sales又太急進,不斷叫我'買啦!買啦!',結果我出o左舖頭後雖然好掛住件衫,好想帶我honey去睇,但最終都唔敢再入番間舖,費事sales誤會佢d '買啦!買啦!' 有效...(我媽話我呢個諗法搞笑過個sales喎...)

六點入o左澳海城睇戲,哈哈,當然係睇鄭智薰套戲啦,不過講真,我都唔敢抱太大期望,只係為捧o下場咋!!結果套戲都幾搞笑o既,而且都幾佩服個劇本,因為戲內o既對白同精神病者人各具特色,全部'估佢唔到',的確夠新鮮同具創意,之但係由頭睇到尾,我都唔知套戲主旨係咩,除o左係講男主角成功令自以為係再造人o既女主角成功食o左啖飯外,我都唔知套戲仲有咩訊息帶o左俾觀眾...

另外,套戲原來有d部份都幾暴力血腥,令我諗起若果套戲o係美國上映,都唔知會唔會有小朋友走去學校有樣學樣...而演技方面,女主角林秀晶做得好好呀,特別係沒有了同情心後的冷酷無情樣,至於鄭智薰呢,我就覺得佢好似做番自己咋,邊有精神病人咁靚身型先得o架,不過除o左佢,我又唸唔到邊個男藝人可以勝任做呢個角色,因為係得佢先可以配襯起呢個天線頭而唔覺太突兀...不過戲內佢o既表情實在太可愛了,不難聽到戲院內女生被他電暈o既聲音...哈哈...仲有仲有,呢個精神病小朋友好似咸濕了點...

夜晚番o左屋企附近食和民,東亞咭七折,不過都唔平...

================================================

今日一家五口又去超級城,但其實我好想出沙田o架,可惜被ban了...

今日係最後一天假了,十一日大假眨眼放完...噢...聽日要back to normal 喇,唔制呀!!!

大眼妹台北自遊行 ~ Day 4

Day 4: 九份 (魚丸 → 阿柑姨芋圓 → 泥人吳 → 悲情城巿 → 昇平戲院) → 飯店 → 機場 → 香港

話咁快最後一日,雖然係夜機,但為o左爭取時間,所以依然晨咁早起身,點知落到車站先知最早去瑞芳o既火車十點先開,等我o地只o係飯店留下買早餐(唔好食!)添,早知行遠d去書本介紹o既舖頭啦!!

第一次坐火車,都有d驚,因為錯過一班車就可能要等多個鐘先再有車o架喇!!!上到火車,本來我o地分開車卡,但當然唔會咁做啦,寧願一個坐一個企,但好好彩,有個台灣人見我o地係一齊,最後讓個位俾我o地一齊坐,真係好人!!!坐o左四十五分鐘就到瑞芳,其實架火車都開得幾慢o架,所以我同honey都好奇怪,點解去九份一定要坐火車,其實公車都應該到吧??

坐公車上九份(竟然撞番尋日o個一家三口,好有緣!),嘩,原來o係高山上o架,天雨路滑,山路又斜,即刻諗起單車禍,都有少少驚!!落車,先去觀景台影相,嘩,大風到吹到我成面髮呢!!叫途人幫我o地影合照,點知個個都只影人唔影景,咁唯有出動腳架啦,點知...我honey唔見o左腳架個轉呀!!!個腳架借o架咋,唔係呀嘛...左搵右搵都唔見,但我明明記得出門口提醒過honey拎番個轉出o黎唔好pack入行李,等呢日有得用...於是我猛叫honey諗番佢拎o左個轉出o黎後放o係邊,點知honey話只記得放係床上,之後就咩都無印像,而我呢,就記得臨check out時明明同honey一齊望過張床,make sure被子下無留低o野先走...估唔到而家都係唔見o野,仲要唔見借番o黎o既o野,慘喇...即刻打番飯店,點知飯店d人又唔helpful,只話執o左房,無發現有o野留低就算...唉...死喇,真係對唔住同事了...

鵝鵝鵝...我又'鵝'了一輪,無法啦,炆都無用,唯有專心食食食...沿住基山街行,先去食魚丸,第一間o既魚丸超大粒o架,不過味道普通,反而另一間無乜人幫襯o既老舖仲好味,我o地叫o左個餐,除魚丸外仲有豆乾包同冬粉,我覺得個冬粉好正,而honey就鍾意個豆乾包!!!之後我o地就見到黑色腸,如果唔係我媽一早講話呢條咁醜o既墨魚腸好味我真係唔會買呢!!!之後仲食o左紅糟肉圓(賣相古怪,味道亦然,麻麻!)、一口臭豆腐同炸雞,食完我已經飽飽o地喇,不過一定要留肚食阿柑姨芋圓,書本講到好多人排隊o架!!!

我o地照住地圖行上長長o既豎崎路(成條路都係石階),點解唔見o既?一個人都無喎,唯有繼續上啦,都有少少支力o架!!噢,終於見喇,原來咁高o既,而且一個人都無,好冷清呢!!買o左芋圓,今次要熱o既(凍o既早兩日係東區粉圓試過了!),由於呢度其實係民居,所以我o地要穿過客飯廳,阻住公公婆婆戶主睇電視先去到觀景座位,估唔到呢度都幾大,別有洞天呢!!由於無乜人,所以窗口位任揀,透過大玻璃邊遠眺海景同基隆山,邊食住熱熱o既甜品(其實味道不及東區芋圓,但咁凍食熱o野好舒服囉!),唯一美中不足係天色唔好,如果唔係一定更好feel!!!

食完芋圓沿住樓梯落,經過泥人吳,店內全部都係老闆用陶瓷整o既'鬼'面具,但影相要錢o架,所以只好o係門外影!!繼續落樓梯,因為個view好正,所以沿路開o左好多茶館,以方便遊客邊嘆茶邊欣賞美景!!雖然都係搵食,但呢d茶館裝潢各具特色,將條街點綴得好有味道,可能因為我o地今日唔使趕頭趕命,所以我同honey特別有閒情慢慢行九份,大家都邊行邊讚呢度,好鍾意呢個地方呢!!!!

再繼續落,見到海悅樓同阿妹茶酒館,書入面都有仲紹呢,不過我o地無入去幫襯,再之後終於見到侯孝賢拍'悲情城巿'o既地方喇,側邊就係'昇平戲院',舊舊o既感覺,好有懷舊味道呢!!!

東走走西走走,最後我o地拾級而上,番上去基山街,最後食埋花枝丸(無影相添!)、草仔粿(我o地捨大去熱o既甜紅豆味,大膽揀o左咸綠豆,食落又OK喎!...呢樣都無影相呀!!)同埋牛肉麵,雖然間牛肉麵無人幫襯,但味道又唔錯喎,或者呢d老店(四十年老店)自恃真才實料,所以唔去拉客先會咁冷清吧,好彩我同honey識揀o者!!!...咦?七里香呢??原來九份無,應該係我記錯o左喇,早知尋日係士林夜巿食埋啦!!失策!

回程,咦?點解架公車寫住番台北捷運復興站??為免等到五點半先有火車,於是我同honey就放棄已買o既火車票直接番台北,雖然車錢貴少少(我o地俾少o左錢,俾司機叫住補錢呢,哈!!),但車程同火車差唔多,至少唔使轉車咁煩,而且dun dun o下不知幾好訓,點解書入面提都唔提呀,搞到我一直以為入九份一定要坐火車添,搞到我o地浪費o左程車票喇!!!

番到飯店領番d行李就趕去坐機場巴士喇,時間剛好六點,好彩無遲,如果唔係要多等半個鐘先有車!!!期間架車經過台北小巨蛋呀,即刻爭取最後機會影相!!!因為遇著平日放工時間,塞車塞o左好耐,七點半先到機場呢(我o地坐KA最夜一班機)!!Check in,咦!隔離咪無線東張西望個主持王欣廷?唔知佢係咪去台灣訪問完d明星呢?Honey唔識佢,只係猛話唔靚呢!!

番到香港,依然凍到震,番到屋企沖埋涼兩點,終於結束四天自遊行之旅,時間真係過得好快呀!!!

Picture of the day: