忙碌的十二月

成晚個腦都無停過咁轉,主要都係擔心呢樣擔心o個樣,今朝7點半就起o左身訓唔返...我爸講得無錯,我就係咁心急(遺傳自我爸)同咁容易精神緊張(遺傳自我媽),honey,辛苦你喇!!!(好搞笑,我爸尋日都o係我honey面前叮囑我去honeymoon唔好樣樣都急急急,樣樣都緊張,因為Honeymoon係relax o架嘛!!!)

講返正題,由於訂造o既東東整唔好,我又有好多屋企o野未買,一月頭仲要上大陸影第二輯相,再加上我honey係深圳返工,我就係機場返,基本上平日放工後係無咩可能'出城'處理到以上事項,所以十二月o既星期六日我將忙碌到爆咋喇...

6/12: 約o左好姊妹影grad photo,夜晚好姊妹生日party!!!(大姐會注意: 由於訂造東東o既舖頭星期日唔開,但東東訂造需時又有少少急住要整好,所以真係十級唔好意思,如果o黎緊呢星期平日夜晚我約唔到我honey出城整,咁可能我夜晚去唔到生日party喇!!!)

7/12: 去拎返d訂,去珠寶展,去駱克道買廁所

13/12 & 14/12: 本來約o左伴娘去cycling,但我諗唔得喇,我得呢星期係兩日都free可以俾我上大陸試影相o既衫,同去買燈,水喉鐵通,甚至上大陸搵造東東o既舖頭!!所以再約過喇唯有...sorry...

20/12: 個半月前約o左幫我影第一輯相o既Michael去拎輯pre-wedding video,無錯呀,影o左大半年都仲未拎,佢年尾又busy,我又busy...!!!夜晚同honey屋企做節!!

21/12: 冬至做節呀,如無意外,honey將會第一次o係我親友前亮相!!

27/12 & 28/12: 暫時係未有活動,但我估到時都係忙裝修同屋企o野,我仲要去整大相冊,買girdle,honeymoon package同電磁爐...睇o黎影第二輯相我都係無咩時間prepare o架喇!!!當然,我希望我可以留返呢兩日去大姐會xmas party同約伴娘cycling啦...

士氣低落!!

又係滿懷期待咁去收貨,結果同上次簽名布事件一樣,令人失望,點解次次訂造o既都無好下場...打擊好大...

一朝早同honey出MK上旅社問資料,之後就去拎信用卡迎新禮品~22吋LCD TV,再之後就去拎兩星期前訂造o既一件東東(唔講得係咩住,保持神秘!!),由於LCD TV加件東東都好重,我仲特登叫我爸駕車出o黎tim!!!

去到舖頭睇件東東,拆開前睇到一小部份,但我已經覺得好唔妥喇,完全係貨不對版!!!舖頭阿姐見到都無聲出,因為兩星期前我同honey係佢舖頭打搞o左好耐,佢都好知道我想造o既係咩,所以佢都無言以對,仲話自己听日上大陸親自問廠!!!

如果阿姐真係親自上廠就最好,至少件貨都仲有可能造得到,但好衰唔衰係今日老闆係度,佢一見出事就加把咀,一尾只為自己辯解,又話要造到我想要o既係無可能!!!!!

o下,兩星期前我幫襯時你舖頭有師傅係度,佢親自講造到我先落訂o架,你造唔到我起初做咩要幫襯你??

我明白你而家蝕o左錢,梗係要幫自己辯護,但我手上張單寫得清清楚楚,而家貨不對版亦係事實,你夾硬講話而家件貨已經係我要o既簡直係自欺欺人,真係火都o黎,你自己兩星期前又唔在場,你加把口做咩,仲要辯解之餘唔俾我o地出聲,好無禮貌!!!

幸好,我方人強馬壯(我+honey+我爸+我妹!!),阿姐又知佢方理虧,最後都話佢听日上大陸親自跟進,其實阿姐一早已經咁講啦,係老闆多多聲氣之嘛,搞到氣氛咁差,真係咩心情都無,又浪費o左我o地唔少時間!!!

雖然叫做settle o左,但我honey同我爸離開舖頭都話覺得間舖最終都會用excuse話造唔到,唉,咁又係,佢o地已經蝕o左,睇老闆咁o既反應都估到就算廠係造到我要求,佢都唔會肯再造過,因為再造分分鐘仲蝕...

不出所料,兩小時候收到阿姐電話,話再同廠溝通過後話而家件貨已經係最好云云...所以再造都係一樣,願意賠返訂俾我...

唉...

好失望...

雖然我咩都無蝕,相反,而家整唔成可能仲好,因為我o地發現我o地request o既尺寸造細o左,而家反而有機會造返大佢,但我真係控制唔到我心情...真係好失望...好擔心就算我去第二間造,結果都係一樣!!!

究竟呢樣我落足心思o既東東事實上係咪無可能造得到??但我明明見到舖頭有相類成品,你話俾我知造唔到,我真係好唔甘心!!!!唔通我真係注定次次都遇人不熟????唉...

=========================================================

下午上o左新居,主要係拼部LCD TV上我睡房牆上,因為我一路都覺得最少要26寸o既TV先夠,不出所料,22寸真係好細,但唔換都換o左,我爸叫我用住先,遲d真係要大d先換...又o岩o既,或者我用落會覺得22寸夠嘛,雖然係免費o者,但我唔應該浪費!!!

相對睡房面牆,22寸真係細o左d,計我話32寸都放到!!!

至於新居裝修方面,d牆大部份已經批好,亦即係話好快可以油油,d磚亦好快開始舖,估計兩星期內可以搞掂,之但係...訂造o既東東唔知幾時整到,燈,廁所,電磁爐,水喉鐵通都未買...唔通要等師傅整好後再搵日約佢再上o黎執多次??我又唔想咁麻煩人,睇怕我要落力d先得!!!

P.S. 部LCD TV而家係屋企用住先,嘻,質素都OK喎!!

奧運馬術義工證書及感謝狀!

終於都拎埋奧運馬術義工o既證書同感謝狀喇,亦即係一切都正式結束!!至於Tech team整o既紀念刊,我最終都係無買到,原因就唔講喇,就當我花唔起錢買啦!!

羊胎素!!

尋晚十一點幾,爸媽終於由澳洲去完旅行番o黎喇,雖然好夜,但我都有落樓下八卦佢o地買o左d咩番o黎!!

我同我妹分別有一set頸鏈同手鏈,另外就係一set羊胎素cream同潤唇膏!!我開頭以為自己聽錯,不斷repeat咁問我媽'羊胎素定羊脂咋?''!!因為之前我爸d同事係澳洲番o黎送俾我o地o既都係含羊脂成份o既body cream咋,羊胎素真係第一次,感覺好似好核突咁,所以忍唔住不斷問...

拎住個盒睇清楚,咦?真係寫住'sheep placenta cream'喎,雖然話而家d明星打人胎素都係咁,我而家只係外敷,但硬係覺得怪怪咁,搽o左會點o既呢?潤d?定無咁易老...哈哈...

大家見到'placenta'個字嗎?

另外爸媽仲買o左好多o野食,但未得閒分配,遲d再share!!!

爸媽從澳洲買給我的結婚禮物!

爸媽去完澳洲旅行番o黎,買o左個靚靚cushion俾我喎,係我第一份結婚禮物呀,哈哈,掛係新居睡房門口都唔錯呢!!!

細心睇其實會睇到成個cushion係由一朵朵玫瑰組成o架!!!

Our 10 Years mini-photobook 第三年搞掂喇!!

第三年都搞掂喇,呢年我去o左新疆,所以無一齊過3rd Anniversary,而且唔知係咪剛入U,大家太busy咁過U life,合照少得可憐,哈哈,不過好彩有張貼紙相豐富一下版面,大家可以去下面睇番!!!

Our 10 Years mini-photobook排版大公開!!

去Yoho Town BBQ!

今日入o左元朗去一pair中學同學o既新居燒o野食!!我第一次去yoho town咋,環境都唔錯呀,個會所好大,仲有飯堂,又幾方便喎,懶唔煮飯時落去食就搞掂,連外賣都可以唔使煩!!

BBQ位置係會所外一個平台,望到泳池,不過已經十一月尾,所以泳池無開,如果唔係一定好熱鬧,更有渡假feel!除我o地外,另外仲有一班一家大細係隔離燒,雖然佢o地燒海鮮好似好正,但唔知佢o地點燒o野,燒到成個爐都起晒火,d火大到要用水淋熄,當時真係好得人驚,你知啦,個爐直接駁住罐gas o架嘛,炸親就唔好...

用爐架燒點都快過用叉,所以好快大家都好飽,不過始終都係用叉燒好玩d呢!!食飽後大家齊齊上主人家新居玩非洲話事啤,我開頭唔想玩o架,因為我以為隻game又係鬥快o個d(我最怕玩鬥快反應o既遊戲!!),但原來唔係,我仲好好彩咁幾次都係我最大,罰o左人幾次呢!!

七點,都夜喇,問主人家拎o左d結婚相睇,好靚,個妝唔'大陸feel',當然啦,男女主角都係靚人,點影都靚!!最後就參觀埋佢屋企d房,好鍾意佢廳o既燈,好靚呢!!

跟住我同honey同Natalie就一齊走先,結束今日元朗之旅!!

電腦殺手

尋日係屋企部電腦,今日係公司部電腦...死因都係不明,但同樣地,兩部機最後都離奇復活到!!!

屋企o個部尋晚成晚開唔到機,其實屋企呢部不嬲都有d問題,簡中就boot唔到機,但只要不斷boot或踼佢就會無事,叫我細佬望過,但唔知點解次次叫佢睇時部機又會正常番!!!尋日開唔到,又叫我細佬睇,佢整o左好耐都話唔知咩事,唉...

今日番工,下午lunch後公司部機彈o左個藍畫面寫住咩dump physical memory, 咩unknown hard error...reboot又reboot都係login唔到,等o左個幾鐘,help desk終於有人o黎睇,結果又係咩事都無...佢o地boot過部機後我又可以順利用得番,好神奇...

番到屋企第一時間開電腦,咦,又boot得番喎,真神奇...希望部機唔好再有事啦...都係襯今晚開到機拿拿聲backup d file先!!

婚禮進度: 倒數七個月!!

今個月無進度喎...我好似真係越o黎越lazy咁!!!本來都有一樣o既,就係簽名布,但出o左事,所以需要再整過!!!!...不過近排都有為honeymoon努力睇資料o既,唔知下個月前confirm到未呢!!!

另外,俾大家睇完我d相後,俾對戒子大家睇啦!!!

主要事項
1	大日子	2009年6月20日(星期六)
2	酒席	萬麗海景酒店 Oasis Room
3	註冊地點	6pm@萬麗海景酒店 Oasis Room
4	律師	Anthony Lam
5	化妝	Meggie Yeung @ Red's Beauty
6	攝影攝錄	Lilam & Roger
7	Snapshot	Andersen Chan
8	婚紗禮服&褂	羅浮宮
9	婚紗相	Sarona Studio (已影) & 麥田映像(已落訂,1月9號影)
10	婚紗相相簿	應該上大陸整, 多謝網友介紹,不過未排好版所以未落實!!
11	小禮物	有少少idea,但可以慢慢再睇多d
12	租車	未搵
13	印帖	未搵
14	婚前檢查	未搵
15	戒子	ctf2
16	餅卡	美心, 唐餅未買
17	場地佈置	未諗點整,可能DIY
18	伴娘伴郎	Natalie & Mark
19	兄弟姊妹名單	姊妹名單confirmed: Athena, Betty, Clok, Karen & Jenny!!兄弟有待confirm!!
衣飾類
20	奶奶衫/媽咪衫	未搵
21	姊妹衫	未諗
22	兄弟tie	未諗
23	新睡衣	未搵
24	飾物	化妝師同羅浮宮都包,但可能會自己再買
25	婚紗鞋 & 褂鞋	買o左閃石涼鞋,可能會再買婚紗鞋,褂鞋未搵
26	禮服鞋	已買
27	禮服裇衫	已買
28	Girdle/束褲	未搵
29	花球	未搵
30	主婚人襟花	酒店包,但唔知夠唔夠
31	兄弟襟花、姊妹手花	未搵
中式禮儀類
32	擇各事項吉時	未做
33	過大禮用品	未買
34	上頭用品	未買
35	安床	未做
36	嫁妝	未買
37	利是封、貼紙、囍字貼	未買
38	花車裝飾	未買,亦唔會買車頭公仔,我同honey都唔鍾意
39	男女家對聯	未買
40	茶壺	未買
41	蓮子、紅棗、米、紅豆及綠豆	未買
42	紅繩	未買
43	紅傘	未買
44	cushion	未買
45	接新娘遊戲	未諗
46	回門豬	未買
47	約攝影師visit男女家	未做
48	封利是	未做
晚宴類
49	戒指枕、羽毛筆及結婚證書套	律師包
50	帖既label	未搵
51	派帖	未搵
52	約攝影師visit晚宴場地	未做
53	片頭 (成長mv)	自己整,但仲未學...
54	晚宴司儀	未搵
55	婚禮場刊	可能整,未決定
56	晚宴流程	未諗
57	酒席歌曲	未諗
58	紅酒	可能o係我爸公司買,未confirm
59	賓客簽名筆	未買,可能diy
60	簽名布	未搵
61	放禮既袋	未搵
62	啤牌、瓜子、糖果	未買
63	賓客List + sitting plan	未諗
64	預備各項尾數	未做
65	同酒店、攝影攝錄師、雙方家人、兄弟姊妹brief rundown	未做
66	各人聯絡電話表	未整
67	各人task list	未諗

Our 10 Years mini-photobook排版大公開!!

大家記得我提過我會先整一本十年小相冊去測試大陸相簿公司嗎?下面就係我o既排版喇!!除第三年我honey硬係唔記得拎張相俾我scan而未整好外,其餘都搞掂喇,target下星期send上大陸整,到時再update大家成品整成點啦!!

至於今次排版好快手呀,前後一個星期左右啦,而且有排pre-Wedding相簿o既經驗,今次又無咁serious,好多都係排兩排就收貨,而且今次排版仲版版都有少少唔同,風格不一,感覺好似生動d咁,反正呢十年我同我honey都變o左唔少吧,哈哈!!

最後而又最特別o既係,今次排版我將honey之前畫俾我o既公仔融入設計入面呀,honey見到時都估唔到自己有份為相簿design作出貢獻,好開心呢!!

哈哈,十年眨下眼就過,係咪覺得我o地老o左好多呢!!

天使蛋榚

今日到公司同事慶祝十一月生日o既同事,終於食到天使蛋榚喇,味道都真係幾OK o既,甜味剛好,唔漏,d cream仲軟綿綿咁o架,我都好少會食晒d cream無剩呢!!

不過,我已經聽過好多人話呢個天使蛋榚白雪雪唔多'吉利'呢!!

兩姊弟

今朝好勤力做家務,抹晒兩間屋o既地同煲水,見d盆栽仲有水,所以無加到水!!下午同honey出完街差唔多成七點先番,落車先醒起未買報紙,於是特登行去買,咁o岩就撞到我細佬,於是梗係等佢去買啦,而我就番屋企換衫拎食物解凍煮烏冬俾我同我細佬食!!

剛入屋收到細佬打o黎o既電話,問我使唔使買菜,其實媽咪一早買o左個大棷菜係屋企,但既然有新鮮o既,當然買好啦,估唔到我細佬又幾細心!!

細佬都番o黎喇,洗埋菜ready開火,咦??個爐頭唔著o既??試o左好多次都唔得,但明明聞到有煤氣味,點解呢??差d就想冒住俾我媽鬧o既危險,用飯煲煮麵,好彩,我細佬醒目,伸手入爐底發現原來個爐要入電(嘻,我係咪好無知...),於是即刻搵屋企有無大電再換入去,果然,個爐即刻開到火,勁呀,好彩有我細佬係度!!(有時d o野就係咁'橋',粒大電照理應該用到好耐,但偏偏就係我爸媽旅行先用晒!!)

終於煮得,其實所謂煮,出自我手就變o左'一鑊熟',話咁快食得,o係我細佬由沙巴買番o黎o既家樂牌冬陰公味精下,個烏冬當然係好好味啦,哈!!我細佬仲特登用手機影相send MMS俾爸爸,佢o地好快打番o黎,話睇唔到,可惜呢!!同爸媽update屋企情況後,我細佬就幫手換魚缸水而我就洗碗,兩姊弟分工合作,此情此景都真係幾難得呢!!

去深水土步睇decoration raw materials!

今朝拎起其中一本瑞士o既資料想睇,但睇唔入腦,都唔知o係邊開始好,而且今日陽光普照,我個心只係想出街咋,所以真係無心機睇資料!!

下午三點,終於等到honey出街喇,我o地去旺角完成埋尋日打算做o既o野,之後再去深水土步睇decoration o既raw materials,不過我o地太夜先去到,好多都趕收工,只可以好趕咁睇o左少少咋,不過我仲未好concrete咁諗到要用d咩去decorate,所以都唔係好知要買d咩...間直一頭霧水!!!

之後honey帶o左我去食好o野,因為我好少出去深水土步o架,而佢就間中會出去呢度篤波,所以都知邊d o野好味!!今日佢就帶o左我去食豬潤麵同埋甜品,個燉蛋同粟子粒露真係十個美味,yummy!!

萍水相逢

今日同honey打算坐言起行,去旅行社拎關於去瑞士同希臘o既資料,之前仲順道去拎信用卡禮品!!

大約三點幾上到旅行社,當時得我o地一個客,原來呢度無希臘o既資料,不過唔緊要,都拎o左好多瑞士行程,其間旅社高層仲親自向我o地介紹tim,不過佢誤會o左我o地係冬天去,而我o地又諗住拎完資料就走,所以都無糾正佢,哈哈!!

拎完資料走人,旅社高層o係門口親自送我o地,話佢有d資料係佢office,問我o地唔介意可以跟佢去拎,有資料喎,當然好啦!!!就係咁,我同honey就同旅社高層一傾就傾o左接近三小時鐘!!!

三個鐘內其實主要都係旅社高層講o野,做得旅社高層,閱歷真係有番咁上下,天南地北,話題一開就滔滔不絕,歷史、地理、文化、時事...,有時我同honey想插口都插唔到(不過要插口都好難,因為我同honey絕對係井底之蛙!!唯一係我honey對二次大戰歷史好有興趣,間中同高層答到兩咀,而高層都有讚我honey呢方面知識唔錯!!!),哈哈!!雖然係咁,三個鐘內我o地一d都唔覺得悶,仲听得津津有味,因為可以听到佢對歐遊o既分享同埋佢自己o既個人經歷,最難得係我同honey其實仲未決定幫襯佢o架,但佢都咁有heart向我o地介紹同提供資料,真係令我o地完全感受到佢從事旅遊業o個份熱心,我同honey都覺得好好彩可以分享到佢o既經驗,可能呢d就係緣份(仲記得離開旅社時仲有另外兩位客人,但旅社高層偏偏就咁o岩幫中我同honey!),就係所謂萍水相逢吧!!(不過我估佢咁好客,年中都應該唔少客人俾佢捉去傾計吧,只係我同honey見識少所以先大驚小怪,哈哈!!)

六點半終於搵到位話走喇(佢真係好多o野可以分享,唔叫停可能講到天光...哈哈!!),由於意外地用o左咁多時間係旅行社,原定要去旺角搞新居o既o野同去深水土步搵decoration raw materials o既plan唯有听日先進行啦!!!而我同honey就係咁拎住一大疊旅遊書番屋企,真係收獲豐富,唔係遇到呢位好客高層,我相信我o地去完honeymoon都唔會有咁多資料,真係好多謝佢!!

我同honey都決定要番屋企send個email多謝佢,如果真係可以keep in touch都真係一個bonus吧!!!

旅社高層前前後後入office三轉搵資料(三次我同honey都無request過o架,佢真係好熱心!!),夾埋就搵o左差唔多5cm咁厚o既資料俾我同honey呢!!!

泰林清倉入場券派完!!??

自得知泰林今個星期六清倉後,我就一直吼住部樂X牌蒸焗微波爐,除上網搵尺寸外,仲特登叫honey放工上屋企度o下而家放微波爐個位有幾大,放唔放得落!!

結果,正當我同honey都為發現蒸焗微波爐個size太大放唔到而煩惱時,我o地睇見yahoo news寫住: 泰林清倉入場券派完!!!!!!!!

o下!!!!

我只差未set鬧鐘早起出去排隊咋!!!我今日已經成日留意有無相關新聞o架喇,點知直到頭先八點幾先知原來今日派籌,仲要已經派完...似乎我都係同呢d著數o野無緣o架喇!!!

不過可能咁樣仲好啦,可以疊埋心水唔使煩蒸焗微波爐放係邊,又唔使掉o左新屋o個個十年前o既微波爐咁浪費...明天可以訓晏d喇,哈哈!!!