送爸媽機

今晚準時五點半放工出去機場,因為我爸媽今日出發去澳洲旅行兼探我媽中學老朋友!!

今次係我爸媽自我出世後廿幾年o黎第一次兩個人拍拖旅行,而我亦係第一次送爸媽機,感覺都幾得意,而且咁o岩佢o地飛夜晚,就到我放工join食飯,真係好難得!!

我o地一家三口去o左T2一間澳門餐廳食o野,其實當時好早無咩人o架,但我媽話呢間好似比較多人,所以就入o左去,味道就OK啦,無咩特別,最搞笑係我o地叫o既都唔係澳門菜,好奇怪!!埋單,原來全部食肆做緊機場員工八折,好抵!

由於我爸媽要趕住七點前去到閘口,所以我o地好快就行番去T1,而我就直接去坐E車,無睇住佢o地入閘,因為我仲要送Burger King番去俾我細佬做晚餐!!同爸媽分別後,我先醒起唔記得送番個goodbye kiss 俾佢o地添,失敗!!

番到屋企得番我同我細佬兩姊弟,呢十一日,我o地要睇實屋企,換魚鱙魚缸水,抺地,洗衫燙衫,幫盆栽淋水,照顧自己三餐,買報紙雜誌...努力呀!!哈哈!!