死亡

今日同親友去拜山,一去到就見到往常供拜山人士休息同消滅拜神食品o既涼亭已經變o左一座座新落成o既空置'公屋'(我都係第一次見咁多空置'公屋'),前幾日睇報紙先話呢d'公屋'兩年後會無位,估唔到今日即刻就見到大約十座新落成o既,似乎真係唔多夠用!!!!唔知係咪見到咁多'公屋',我婆婆忽然講起對自己後事o既要求呢!!!

夜晚睇鏗鏘集咁o岩又係講'死亡',講有個社工帶班公公婆婆接觸'死亡之旅',去參觀長生店、火葬場骨灰龕和墳場，並試穿壽衣!!!呢班公公婆婆其實好'潮'好'前衛'呀,能夠坦然面對死亡,事先準備,唔使怕仔女安排得唔合己意,仲可以令自己走得安心!!!仲有,原來好多公公婆婆似乎對死亡都看得好淡,身後事簡單就得,因為塵歸塵,土歸土,靈魂離開後只剩軀體,的確無需過份執著於儀式,生老病死只係人生必經階段,睇開少少,大家又可以認識'死亡'o既另一面!!!!

希望將來我老o左,都可以學呢班公公婆婆咁前衛,坦然面對'死亡'就好喇!!!

另外,拜完山後我o地就地處置埋d食物~野餐!!其間我最細o既舅父講番起佢兒時o既往事,話說當年地鐵通車,我大舅父就帶佢去坐啦,點知佢坐地鐵都會暈浪,於是大舅父只好帶住佢由觀塘行番長沙灣(!!!!!!),而小舅父由於太細個,所以後尾要我大舅父背住佢行去長沙灣!!!聽完之後除o左覺得好笑外,其實我都有少少感動!!!!上一代雖然物質唔豐富,兄弟姊妹又多,但佢o地可以相親相愛,感情要好,而我呢...同細佬妹感情淡如水咋...!!!!再之後回程喇,由於我大舅從事一個同警察有密切關係o既行業,所以佢順道上去浩園致敬,其實我都有少少想去睇o下,不過自問可能係出於八卦,未必真係有心,屋企人又無諗住去,所以都係無去到lu!!!