照顧金魚的起居飲食

(27/05/2007)爸爸上班,妹妹跳舞,細佬玩小型賽車(最後因天雨玩唔成!),honey打war game...結果呢個周日又成為我同我媽shopping o既日子,雖然只係o係每個星期都行o既商場shopping,但竟然由十二點行到三點半先番屋企,都幾勁!!!至於收獲呢,就係靚袋一個!!!

===========================================

夜晚爸爸為我進行'換水'特訓,皆因佢o地將會去歐洲旅行十天,其間我爸缸金魚o既生死存亡,就要交托在我手上!!!

講到'生死存亡'咁嚴重?無錯,因為我家曾經發生過兩次金魚兇案,兩次都係o係旅行其間發生!!!

第一之我仲好細,去完旅行番o黎缸中最老一條紅運當頭唔見o左,細看魚缸,發現細細o既半透明白色魚骨,原來條大魚(條魚都算養得耐,所以係缸中最老最大條!)已經慘成其他金魚七日o黎o既食糧,食剩白骨,十分嚇人!!!

至於第二次,諗住餵定金魚唔關魚缸氣泵應該捱到五日吧,點知落機番到屋企門口,o係走廊位置已經聞到陣陣臭味,仲以為係鄰居d垃圾臭,點知一開屋企門,不得了,惡臭難擋,向屋內一望,發現魚缸已成一缸混濁血水,氣泵停o左,懷疑係旅行其間大廈停電所致(閃電o卦!),結果成缸魚缺氧而氣絕身亡!!!如果我o地再去多幾日旅行,想信魚屍o既腐臭味一定會令鄰居以為發生兇案去報警,結果當晚我爸同細佬旅行歸家都無得休息,要漏夜清理...直到而家,o個陣腐臭味同混濁血水仲深印我腦海呢!!!

所以去幾耐旅行都好,我爸必需先諗定點樣安置d金魚,今次我唔去旅行,重任自然交到我手啦!!!

其實自我出世有記憶後,我家便放著一缸金魚,細個時都會望o下o係水中游o黎游去o既佢o地o架,認得邊條打邊條之餘仲同細佬妹爭住要爸爸俾我餵魚糧,但人漸漸長大,不知不覺間竟然對小生命o既存在失去了感覺,再無站在魚缸前駐足賞魚o既閒情,我而家連缸中有幾多條金魚都講唔出,更莫講話要我照顧佢o地十天o既飲食住宿啦,所以'換水'呢個任務,對我o黎講都真係幾有挑戰性o架!!!

o係爸爸指導下,終於第一次幫魚缸換水,咪以為換水好易呀,其實都有d學問o架,只係簡單令缸水從喉中流出去水位已經係一門物理學問(水壓及空氣壓力!!)!!!另外,仲有好多o野要注意o架,好似換水唔快得啦,一次過唔可以換太多水啦(最好唔好換多過一半水!),仲要記得熄泵同留意水喉唔好吸親d魚又或者唔好跌出缸,如果唔係,d魚一唔適應水溫就好易病同死o架喇!!如果換水其間分心唔記得留意水位,水滿瀉除o左會令成屋水浸有排清理外,仲可能會整濕魚缸用o既電掣,屋企跳fuse事少,電親自己事大呀!!...好彩,自少見得我爸換水換得多,大約步驟都知,不過想信我要o係佢o地去旅行前實習多幾次先可以令我爸放心將成缸生命交俾我呢!!!哈哈!!