用錢買時間

好彩尋晚未夠十一點就上床訓,所以我凌晨睇完波,今朝起身都唔太眼訓!!!八點九出門口去大角咀見工,開頭以為大角咀好'山卡啦',但原來o係奧海城附近,唔太難去!!朝早呢間係一間建築公司,我apply o既係屬於Technical Team o既Research position,Interviewer同樣來自HKU,佢問我上過咩prof 堂,好彩我仲up得出一個

!!呢個interview問問題o既方式同其他人唔同,佢好著重我o既'心路歷程',一個鐘頭o既對答閒談,佢似乎都了解晒我由入U到而家o既生活咁...好少interviewer會問得咁細膩!!佢亦用唔少時間介紹公司及工作性質,感覺當然無我前日見那份programmer咁專業,但我覺得自己條件的確幾切合佢對呢個職位o既要求,而且呢份工佢講明唔demanding,著重俾空間員工學習思考同分析,似乎係一份舒服工,的確幾吸引!!!最後佢話佢最遲下星期初會有決定,太好喇,就算唔得都唔使我等到囉囉LUEN!

朝早十一點,in 完朝早份工喇,本來約o左o係尖咀番工o既Vivi食lunch,但我最終都係唔想抵受o係街外流連三四個鐘o既痛苦,所以寧願花多少少(比唔番屋企用多十幾蚊)錢坐車番屋企換番同媽咪食飯,番屋企上網同睇報紙o既時間!!!

有o野做o既時間過得特別快,兩點九我又出門口去灣仔,等車等o左二十幾分鐘,四點interview,但巴士三點兩個字先到,差d嚇壞我!!好彩最終3點50到達,仲要係最早到o既一位candidate呢!!!四點開始written test,原來只有三位女孩,份卷呢就只係12條MC,頭六條係關於兩個graph,後六條係文字題,答番每條o既句子係咪logically true deduced from 兩段passage!!!呢d題目中學生都識答呢,我覆完卷都只係二十幾分鐘,好彩個HR話可以早走,因為佢竟然話個半鐘後先收卷呢!!!!老實講,為o左呢十二條問題而要我用二個幾鐘來回,真係覺得有少少過份,呢d時間真係用錢都買唔番!!!!

番到屋企沖完涼食埋晚飯...噢...忽然又眼訓又腳軟,睇怕勞碌完一日,今晚都係早d訓好d喇!!

P.S. 雖然而家成個人散晒,但尋晚場波的確幾好睇,值呀!