原來放榜

今日照樣同媽咪出去食lunch,見到好多學生,之後我媽話我聽今日放榜!!噢,放榜?呢件事好似已經同自己相距十萬八千里咁遠囉!!!夜晚,我識做地打俾我honey個妹問o下佢考成點,仲俾o左少少意見,不過應該幫唔到d咩!!!

夜晚睇波,本來我無乜preference鍾意邊隊,但咁樣睇波似乎無乜意思,本來同Menu一齊支持有主場之利o既德國,點知後尾覺得自己好似支持阿根廷多d!!睇到下半場我部畫面忽然停o左,搞到我好心急,搞o左十幾廿分鐘先睇得番,但錯過o左德國入球...最後場波加時射十二碼(原來大陸叫十二碼做點球),好緊張,德國個龍門好勁,撲到兩球令阿根廷輸波!!噢!兩點,好眼訓!

Yahoo Email又Down o左!!

可惡o既Yahoo Email又down o左,要搵工o既日子無o左email真係好煩!!!!仲用o左我成日時間不斷又開又close IE咁試入yahoo email account,但都唔成功,激氣!!!!!!

我其實有其他account,但因為我慣o左所有application用yahoo,我所有聯絡都係yahoo,所以唔想亂轉用其他account send application...但我個yahoo實在成日有問題,再咁落去,睇怕我直頭要轉用另一個gmail喇!!!唔知gmail會唔會穩定d呢!!!!????

試account其間上網睇o左"獨家試愛",都幾好睇,不過我唔多鍾意結局,好唔同意唔理將來,只顧眼前呢個觀點!!!!

火車上遇見偷窺狂

朋友們先唔好被我嚇親,受害人唔係我!!!但係遇見呢d偷窺狂,身為女性,個心始終都唔係太好受!!

話說今日同媽咪出又一城行街食o野,大約兩點八個字回程由九龍塘上火車番屋企,本來我同我媽企係大約第五或六車卡o既其中一道門邊,但唔知係邊個醜男人o既體味嚴重,等火車到達大圍站時落o左唔少乘客後我o地即係向後走去另一道位於左邊o既車門站!!!!到火車駛經沙田時,我忽然望到右方有位著住黑白粗橫間牛仔褲,頭髮稀少o既男人竟然係度偷窺!!!!!!!!!!!!!!!!!!!!!!!!!!!由於當時佢背向我,我清楚見到佢交叉雙手,其中一隻手拎住部6280手機拍攝企o係火車右方車門,身穿粉藍色校服o既中學女生,我仲見到佢只用手機拍攝女生o既身體,仲zoom近zoom遠咁影,我於是即刻叫我媽留意!!就係呢個時候個男人唔知係咪想搵第二d目標,佢四圍望,後尾望向我呢邊,我於是同我媽一齊"掘"住佢,意思當然係話佢知我o地見到佢惡行,希望佢停止佢o既變態行為啦!!!!點知佢望到我o地望住佢,仲夠膽繼續影多兩影那女學生!!!!當時我個心已經不斷諗住如果我出聲o既話會點,係車箱入面會唔會有人幫手捉住佢等等...我個心真好驚好亂!!!!

無幾耐後,個男人再望過o黎,唔知係咪覺得行踪被發現,所以佢慢慢向車箱前方行去相隔兩道門,其間我仲一直望實佢,留意佢一舉一動,我見到佢一路行一路望其他女仔,雙手依然交叉胸前拎住手機,佢仲不時望番轉頭望住我呢邊,我當然好驚,都有縮開唔想俾佢望到,但另一方面又覺得我應該繼續"掘"住佢!!!!後來佢向車箱後方(即我呢邊!)行前一道門,我見到佢又有所行動喇...但我始終唔夠膽大聲喝停佢!!!o係我漫長o既內心交戰中,原來到o左大學站,唔知個男人係咪見我一直望住佢,所以佢怱怱拍完最後o個位女仔就落車!!落車後佢向後方行,所以我同我媽繼續'掘"住佢,佢竟然亦一直望住我o地,好似一d都唔驚!!!!火車又開出喇,我越諗越覺得個男人除變態外,仲似乎精神有問題,因為佢樣貌有少許似係"傻"o既(並唔係智障那種),而且佢竟然從無途避我同我媽眼神,神情呆呆滯滯似思考我同我媽係咪發現佢用手機拍人而一d"驚徨"或"心虛"感覺都無!!!!!!!真懷疑佢之後會唔會再上下一部車繼續變態行為,好膽心!!!

遇到d咁o既事,我好唔開心,個心好唔舒服,仲忍唔住毛管"動"打幾個冷顫,呢d人o既行為令人作嘔!!!同時,我亦為我唔夠膽出聲而一直唔開心,我覺得如果我夠膽出聲,可能就可以阻止佢再拍其他人...只係簡單一句"非禮"或"救命"竟然咁難出口...好無用!!!雖然我唔係受害人,但目睹呢一切,仲要同呢個變態人對望咁耐,我而家腦海中仲不斷出現佢那可憎o既面目(見第二次我一定都會認得!!)...真希望呢個變態偷窺狂o既樣同遇到呢件事o既可怖,核突,唔舒服感可以快d從我腦海中消失,亦希望其他遇到相似事件o既人唔好好似我咁唔夠膽出聲,呢d人真係應該得到報應!!!!!!!!!!!!!!!!!!!!!!!!!!!

世界盃

世界盃都開始o左幾個星期喇,剛開始時我試過用軟件網上收睇,但唔成功,可能因為被我的上網公司block了!!點知尋晚Menu話我知另一個網上電視軟件可以睇到,於是我又試o下得唔得,結果畫面流暢,我仲可以邊睇邊同Menu同May三人會議討論靚仔o既碧咸,哈哈,咁樣網上睇波又幾好玩!!!

英格蘭場波打完已經一點,之後三點再起身睇荷蘭對葡萄牙!!好彩有得網上睇,因為我honey都話呢場波幾好睇,又多埋門起腳又多黃牌紅牌,最重要係我鍾意o既荷蘭輸o左,之後無得再睇佢o地!!!哈!!睇訓少少都抵!!!

巴士奇遇

今日同honey出旺角,最主要目的其實係去先達換番張TFCard!!!同之前出街一樣,我Honey會係佢屋企附近o既總站先上車,而我就相隔一陣後出門口行去我家附近o既車站上車Join佢!!!見到車到喇,"咦?車到喇喎,honey仲未打俾我叫我上車,即係唔係呢架車啦!"我心諗,於是我無上車,再等下一架,點知就係呢個時候Honey打o黎問我:"你去o左邊呀?",我話:"我咪係車 站囉!","o下!!"!!!!!!原來honey竟然唔記得打俾我叫我上車,我於是好嬲,因為之前試過連續兩架車,佢唔打俾我我又點知honey係唔係架車度喎,今次仲係多年o黎第一次兩個分開車坐,真激氣...於是我只好好氣憤咁上下一架巴士,出到去旺角先會合,係車上面我仲猛o係度諗應該點"處置"honey添!!!

奇怪o既事發生喇!!!!當巴士駛到窩打老道時,忽然有一位巴士司機o係路中攔截我坐o個架巴士,原來係巴士壞車,d乘客要轉車過o黎!!!望真d,架車原來就係我Honey坐o個架,於是我即刻打手提俾佢confirm,原來真係喎!!眼見好多人上巴士,我都有少少拍Honey上唔到車,但好彩後尾都上到,但我o地只可以遙望!!本來我想'掘'住佢o架,但唔知點解我忽然消晒氣,做口形鬧佢時竟然引唔住想笑,但又唔笑得,因為怕其他人望到以為我係傻o既!!哈,我望到我honey都有好似我咁忍笑呀,真係辛苦,哈哈!!!估唔到本來分開坐兩架巴士,最終又坐埋同一架...我同honey都覺得好玄妙!!!

落o左車,本來plan好要惡o既我當然惡唔出啦,之後我o地就去o左沙嗲王,因為我想用o左就到期o既coupon,所以叫o左好多o野食,但天氣實在太熱,間o野d冷氣好弱,食得好唔舒服!!!之後行街買手機貼紙換TFCard,最後都支持唔住咁熱o既天氣去o左新世紀,大約五點幾番到屋企,係火車站仲見到中學同學Sheep,好耐無見呢!!

由新界北到香港南區見工

今日由新界北去到香港南區見工,由於未去過咁遠,所以我預早兩個鐘出門口,好耐未試過七點幾起身,到八點出門口是我仲覺得自己口腫面腫,哈!!!尋日個HR教o左我坐咩車,而我又上網睇埋地圖,所以今日好順利就到達,坐火車到紅磡再轉巴士只係一個鐘頭二十分鐘,估唔到橫誇成個香港咁滯都唔係太耐!!!

由於比約定時間早到四十分鐘,我只好四圍行了解環境!!!但見四圍都係工業大廈,雖然我上網明明知道間公司唔細,但始終有少少膽心!!好不容易來來回回咁行足半個鐘,終於上去interview,一入lobby睇水牌,原來間公司佔五層樓咁多,個心即刻安定落o黎!!!上到去亦唔係工廠格局,不過我估間公司應該幾環保,因為明顯地我感到佢奉行緊政府推廣o既25.5度室溫!!!!填完form就見HR Manager,尋日係電話中已經feel到佢幾nice,今日interview佢都無問一d難答o既問題,感覺幾casual,而我頭半段用英文講番以前o既工作經驗時竟然無猛咁'er'喎,太好喇!!最後HR Manager同我講佢要問問Department Manager意見先知考唔考慮我,因為佢o地個job ad其實係請有5年經驗o既人呢,雖然係咁,HR Manager都好好人話會幫我同department manager講我有讀過相關o既course,因為佢o地都好難搵到合適人選呢!!!希望佢o地會認真考慮!!!

回程喇,諗住順路去先達換番張TFCard(我買新機張card係壞o既!),點知我摸門釘,原來十二點幾太早,d舖仲未開門!!不過我見到原來唔少人好似我咁樣摸門釘,大家都好無奈,但又好搞笑!!於是我就行去買極之好番屋企同媽咪撐台腳,途經一間特賣場,竟然見到我前日買o既裝飾手機o既貼紙賣$5,我前日買$15,仲要買o左兩張,真肉痛!!!由於太平,所以我今日再入o左d貨,今次買o左d比較sharp同立體o既,你估我部醜小鴨扮唔扮到下面o既天鵝呢????哈...

呢兩個forum有好多好誇o既手機裝飾:
http://www.fightclub.com.pk/forums/showthread.php?t=67822
http://www.twbbs.net.tw/656880.html <=超誇張!!!

等電話

尋日同今日o既天氣都係古古怪怪,尋日仲邊出猛太陽邊落大雨,可惜見唔到彩虹呢!!!

尋日用新手機影底o既半晴半雨天氣!!

今朝miss o左個無來電顯示o既電話,搞到我日思夜想係咪interview電話,好驚佢唔會再打o黎,我已經成三個多星期無in咁滯(前幾日係朋友幫手安排所以唔計!),連朋友們都為我著緊,仲幫我睇resume同cover letter有無唔妥,無理由會無電話...!!!可能係暑假,好多job被暑期工取代吧...唯有咁樣安慰自己啦!!...好彩,皇天不負有心人,心掛掛o左成朝後我係下三點幾又收到個無來電顯示o既電話,原來真係約我interview呀,實在謝天謝地,不過我聽朝要一早出門口呢,由新界北走到香港南區到黃竹坑,好遠呀!!!!!!希望明天順利!!!

另外,今日繼續係屋企玩電話,裝o左好多o野,仲為呢部醜小鴨貼花花裝飾扮靚靚,哈!!

Lucky 7!

時間眨o下眼過o左七個年頭喇!!今日係我同honey o既特別日子,雖然Honey請唔到假,放工後比較支力之餘仲要未病好,但好彩佢都仲有精神陪我食番個西式大餐慶祝,都咁多年喇,大家又懶,就算慶祝得簡單d都開心!!!哈!!

我o地大約七點幾出到沙田,之後就上七樓搵o野食,其間見到余慕蓮之外仲發現呢層樓原來開o左個"Starry Garden",個公園仔入面有遙遙椅,噴水池同樹,全部掛滿燈飾,我o地去到時剛入黑,好靚呢,唔怪得叫"Starry Garden",咁靚當然有影相啦,如果呢度早開七年,咁我o地又有多個好去處喇,至於而家...咁多年喇,仲點會咁有情調去公園散步喎,哈!!!!之後,我o地繼續搵o野食,本來有間印尼o野好多人食,我o地都諗試,但Honey喉嚨痛,所以最後無去到,去o左A1 Restaurant!!呢間o野開o左好耐,但我o地一直無食過,其實尋間都有上網望過其他人o既comment,今日一去,果然無錯,呢度望落好有情調,但實際上入面好嘈吵,坐位好迫,同隔離位好近,無乜空間!!!至於晚餐就有沙津bar,餐湯(個綠豆忌廉湯幾好味!),主菜,甜品bar(唔好食!!!)同餐飲!!!我叫o左個鴨胸鵝肝配局薯,honey叫o左什扒餐!!!咁o既價錢份量點可以唔多呢,不過味道同環境認真麻麻!!Anyway,開開心心食完飯後我o地就番屋企喇,呵呵,呢個特別日子係咪過得好簡單呢!!!!

P.S. 其實我homepage同我blog上星期就改o左background,其實個background係關於今日呢個特別日子o架,由於唔想寫得太揚,所以我講o左俾我Honey知後佢都係睇唔到...哈...

醉心研究中

今日lunch照樣陪媽咪有食送,下午番到屋企到而家就一真醉心研究我部新手機,由於說明書係日文,如果要自己慢慢查字典睇實有排學,所以今日用o左唔少時間上網搵英文說明書同上各大小手機forum搵料,玩o左成日只係研究到點用手機透過電腦個藍芽o黎上網!!!哈,上forum得知屋企附近個商場有免費wifi,太好喇,咁我出街都上到網喇,過幾日要試o下先!!!另外,可惜跟機送o個張TF Card唔work,搞到放唔到大容量o既片同音樂入去試,仲要拎去換添,可惡!!!!!不過呢個新"玩具"功能真係唔少,有排我玩,哈哈!!

唔要marketing呀!!

今日honey病o左,喉嚨痛同咳,請o左病假,不過好彩佢無唔精神,仲約我出去食飯買衫,最衰係我趕住出去interview,搞到佢無時間慢慢揀呢!!!

今日去o左觀塘見工,其實呢份工係Clok托朋友幫手安排o既,首先做o左一個鐘三個字written test,頭45分鐘係multiple choice考programming,前半部關於java o既我因為未學過所以好多唔識,好彩後半部係html,自問都可能全部答o岩...另外半個鐘就係Long question, 都係問番d電腦o野,我估我答得中規中距啦,不過成份test都令我諗起以前U考試咁,好搞笑!!!再之後半個鐘就見HR,不過我問過喇,因為佢o地要識java同J2EE o既candidate,所以我應該無行o架喇!臨In完時個HR仲問我其實有無興趣做marketing,唉,好坦白,我唔想做marketing喇,雖然我個working experience同marketing脫不了關係,但只係短短一年經驗就令我好似被定位去marketing咁,如果今次我話有興趣做,想信我以後都走唔甩marketing,想轉行就難上加難!!!所以真係奉勸各位發現自己唔適合某行業就要的起心肝灑脫咁離開,唔係o既話到真係到年資又大人工又高時先轉行重頭開始就大獲喇!!

雖然呢份工無乜望,但我好多謝Clok同佢朋友咁幫忙,為我操心,麻煩晒喇!!!!!鍚番你十啖啦!!!

開心爸爸節!!

祝我父親大人日日都快快樂樂,對住我呢個"新"牌仔唔好咁勞氣(雖然我知佢其實好開心有得發表佢老練o既駕駛經驗...哈...

)!!!

今日lunch去o左川滬食飯,本來我大大聲話要俾錢,點知埋單時先知原來我唔夠cash...我本來滿有信心夠賣單,但完來我唔記得我尋日用o左一百蚊增值八達通,所以搞到唔夠錢,失禮,失禮!!!!不過我估我偉大o既爸爸唔會介意...嘻...

今日除o左係爸爸節外,仲係我婆婆農曆生日,所以今晚要去o左酒樓食晚飯!!!由於我想去旺角睇電話,所以成家提早三點出門口,由我駕車出去!!!點知去到吐露港時遇著狂風雷暴,由於駕駛技術有限,所以俾我爸'訓導'o左好耐,最終為安全起建,都係改由我爸駕車...!!!!去到旺角,我同我爸去o左先達,而媽同妹就去旺中shopping,不知不覺,我同我爸係先達流連o左個半鐘,最終格到間最平d sales又幾好服務o既買o左我最近上網留意到o既日系Docomo FOMA smart phone, 雖然俾個sales講笑話我父親節唔係買手機俾爸爸而係自己買,但我知我爸同我行先達都夠佢開心,因為我爸不嬲都鍾意睇電腦/科技產品,我有玩具等於佢有玩具,哈哈!!!!!

除o左我有收獲外,我妹同媽都有買到衫,真happy!!之後我o地就去石籬邨,因為我舅父識人,所以今晚餐飯既好味又大碟,有黃金蝦,八寶鴨,佛跳牆,仲有一個超大壽包(入面蓋住o左六個正常size壽包!!),個個食到肚都突埋出o黎...!!!!!今日真係好開心呀!!!!

呢部就係我部新大牛龜手機, M記M1000

Spec: 2.9寸mon, Symbian 7.0 UIQ OS (即smart phone, 可以睇word/pdf/ppt/zip/excel), Bluetooth (support stero bt headphone), 3G, 130萬象, mp3 ringtone, wifi (即可以上網), 同埋係日本DoCoMo FOMA手機, 有日文menu,可以學日文,哈!!!!係就係樣衰少少,大牛龜成168g重,但如果佢樣靚d就唔只我而家呢個價囉!!!...而家賣單只係$2080,咁o既spec真係好抵,最衰今日無買到轉插(因為日本機,所以個插得兩隻腳),所以未叉電未有得玩新機!!!)

出街 (好難諗標題呢~)

今日一朝起身睇o左"再見熒火蟲",雖然我係宮崎駿迷,但我竟然未睇過呢套動畫呢,之前成日聽日講話呢套動畫會睇到喊,今日終於睇o左,兩兄妹真係好可憐呢!!!中午同honey出o左去沙田shopping,好似好耐無同honey出街咁!!!我帶o左佢去風月堂食,但原來星期六無午餐,無咁抵食,但依然好好味!!!!之後就呢度行o下o個度行o下,睇衫睇書睇手機,近排我上網留意到有部好平o既日本水貨機,大Mon+wifi都係二千頭,好抵,點知今日見到真機竟然賣二千尾,抄到咁鬼貴喎,可惡!!!!但我honey話個樣好差,又大部(168g大牛龜!!),叫我唔好買,要大mon不如諗N記6708...但如果真係二千頭買到大mon+wifi又真係好吸引,樣衰少少都唔緊要...再諗諗先!!!

眼痛!!!!嗚...

今日一朝起身,右身紅紅腫腫,唉...話說我大前日訓覺時狂捽眼,前日右眼就開始少少痛,到尋日開始,每眨一次眼都痛一下,只係眼唔腫,所以我仲照帶隱形眼鏡,尋晚已經醒目,帶住眼罩訓,點知今朝都係逃唔過眼腫o既命運,腫到唔係太合得埋右眼...仲好痛添呢,所以一朝早就去睇醫生,希望星期日晚見親友慶祝婆婆生日+父親節前可以消腫啦!!!

雖然去隻眼好痛,但都無影響我同我媽去旺角shopping o既興志,只係一條短短o既花園街就已經行o左兩個幾鐘三個鐘,認真勵害,哈哈!!!我今日買o左一條裙一件背心同一頂頭'QOO',因為好似話今年興呢,所以$18平平o地買o黎玩o下!!!本來我仲睇中一條短牛仔褲,但無我碼,所以被迫放棄!!!Shopping完我o地番到屋企都成四點半囉,好耐無試過陪我媽shopping咁盡興,大家都有收獲,好happy呢!!!!

======================================

睇報紙見到今年下半年紅館好多show呀,想睇o既有八月尾o既草蜢,九月初o既Jolin,同十二月o既Rain呀,嘩,好忙呀!!!!

=======================================

仲有仲有,今日收到我細路係法國寄o黎o既電郵呀!!

冬陰公湯

呢兩星期個心都不斷期望會有電話搵我叫我interview,但點解每日除o左我honey惡作劇電話扮約我interview外(我真遲早狼來了,真係有人打o黎俾我我都當係我honey玩我而白白錯失機會...)就無任何電話喇...真係等了又等,等'你'等到我心痛...!!!!

雖然天氣唔好,但為免日夜'屈'係屋企悶悶不樂,所以今日陪我媽去o左沙田行街,買o左兩件靚睡衣俾我爸,仲o係西田超巿買o左盒即食冬陰公湯,雖然廿幾蚊幾貴(泰國o野一向好鬼平o架嘛!!),但以我咁鍾意冬陰公,試o左咁多冬陰公味食品o既經驗,呢盒即食冬陰公湯真係好好味,好正呢!!!yummy!!

有心思o既結局

火舞黃沙終於做完喇!!個結局幾好睇,睇到我好感動呢!!!!

其實成套劇我一路都有追,中間我估大約miss o左兩三集啦!!!我覺得套劇第一同最後呢集都拍得好好睇,睇得出編劇o既心思,黎姿同林保怡個角色大團圓,好似金枝欲孽延續咁,真係好感動...至於中段呢就普通啦,好多計謀,多到又亂又唔明,miss少少都唔明個角色做緊乜同為乜!!!其實呢套火舞黃沙算唔錯啦,但可能佢放成千萬去拍,d人又有好多expectation,所以先會有比預期差o既感覺吧...

P.S. 原來而家下午有多啦A夢睇,但大雄媽媽把聲唔同o左呢~

麵包鴨?!

大家會又有活動喇!!!今次都係第一次o係APM舉行大姐會生日會!!!首先我同Athena同Cindy早到少少去行街,之後大約七點就同Emily去到"King & I"等Bess同Clok喇!!!!今晚簡真係手信大集匯,因為Athena,Cindy同Clok先前都去完旅行,而我就將之前一年o既相燒o左做VCD派俾大家!!!!Athena o既上海手信係一對對好可愛o既"婆仔鞋",Clok o既日本手信就係好搞鬼o既Sushi Pen!!!至於今晚餐晚飯我o地就食o既係泰國o野,其中Clok猛叫我o地一定要點"麵包鴨",哦~原來係一味咖喱雞,佢係用一個木製o既鴨型兜裝住,我一睇就諗起小朋友o既鴨仔啖罐,哈哈,至於味道呢,OK啦!!!食完後仲有甜品,因為Cindy o既上海手信就係朱古力,佢仲特地溶o左d朱古力親手整過,變o左好可愛o既麵包超人樣呢, 而今日Clok又去o左學整朱古力,所以我o地又有美味o既貴價朱古力食,真係大飽口福!!!至於今次生日主角Cindy o既禮物就係一隻好靚靚o既戒子,雖然佢平時無戴,但希望佢肯嫁俾大姐會為奴為婢,鍾意隻戒子同多d戴啦!哈哈!!!之後我o地傾到差唔多十一點先走,今次話題仲提到買樓呢,似乎我o地真係唔認大個都唔得喇!!!!臨走時係APM見到勁多人睇緊波,原來仲有十五分鐘完場,於是我就拉埋阿Bess陪我一齊湊熱鬧!!!!!

呢場係荷蘭對塞黑,我最鍾意荷蘭,因為件波衫夠搶鏡,哈哈,至於人呢,我只認得雲達沙一個,因為八年前睇世界盃認得o下...至於場波呢,一o黎我唔識睇,二o黎我企係人群中,我覺得其他人o既睇波反應仲好睇,每次成場人一齊起哄真係好震撼,氣氛幾好,就算我唔識睇波都會因為咁大班人一齊睇而好易投入個氣氛(無錯,係投入氣氛,唔係投入場波!!!!)...每次人群歡呼嘆息我都忍唔住覺得d人反應好好笑呢..哈哈!!!

下次唔買!

今日同honey食完豬排麵後就陪o左佢出去金鐘,不過唔係行o左好耐就番屋企,點知番到屋企附近時我honey先發現我對涼鞋無o左粒最大o既裝飾石,於是我沿路走番去我落車o既地方,但係都唔見,其實我都唔知我係邊度甩...唉,對鞋新買o架,著過五次都無呢,粒石應該配唔番,好心痛呀!!!!上次我對涼鞋都試過唔見石,但就無呢對咁明顯同礙眼,我諗下次再買涼鞋,我都係唔買呢類會甩石o既款喇...嗚...

kyoko

今日用o左好多時間update自己個網頁,改o左background同加o左一欄講深田恭子,搵o左好多佢o既相,好靚呢!!!

雖然珠圓玉潤,但依然很可愛呢!

對於深田恭子(Kyoko Fukada),我是有一種情意結的！因為我可是跟這個 漂亮女生同年同月同日出生的哦!!

深田恭子十五歲就出道,與金城武拍"神啊!請給我多一點時間!"而開始廣為人認識,當時我仲係一個傻o下傻o下o既中三學生,但深田恭子就已經憑住佢洋娃娃般o既美貌迷倒o左萬千少男少女呢!!

初時,記得我只係覺得深田恭子呢個女仔個樣清純得o黎幾有性格,雙眼好靚好迷人,所以都幾喜歡佢(我不嬲睇明星都係以貌取人!!),後尾知道佢原來同我同年同月同日出世,感覺便變得不一樣了!!!

試諗o下 世界上竟然有個咁靚o既女仔同自己同年同月同日出世,咁如果自己都可以好似佢咁靚、如果自己可以同佢一樣受萬人寵愛、如果自己可以同佢同一命運,咁樣唔係一件令人開心o既事咩?!就算命運唔同,但作為自己幻想o既投射,睇見佢可以星途燦爛,就好似世上另一個我(NANA!!)完成自己夢想咁,感覺都幾奇妙!!

深田恭子出道兩年後,我開始拍拖,我發現我Honey覺得深田恭子好靚,所以幾鍾意佢,由於 想自己成為Honey心目中另一個深田恭子吧,所以我就更加留意深田恭子o既報道,雖然未至於睇晒佢所有劇集,但我電腦中儲仔o既深田恭子Wallpaper已達過百張,唔知咁樣算唔算對佢著迷呢?

而家,隨住深田恭子體型越脹、化粧越濃,現在佢o既人氣好似已經大不如前,連我以前bookmark o左o既深田恭子網頁好多都消失o左,我honey都話佢無以前咁靚,唔再喜歡佢喇!!!不過可能我身型亦同佢一樣不斷膨脹,所以我並無因此離棄佢,特別係每年生日,我年年都會留意報紙娛樂版有無佢生日o既報道,就好似年年都有人記得我生日咁,哈!!!

唔知同年同月同日生日o既我同深田恭子,又有幾多相似同唔相似o既地方呢???