VC Re-U

屋企人番o黎後唔使再同honey為星期六日無節目而煩惱,今日又可以一家人出去食lunch,仲係我ja車添!!其實佢o地去旅行期間我都想自己開車兜Honey吹吹風,但我又唔識路,而且近排實在太論盡,萬一撞花架車就大件事,所以最後都係打消o左呢個念頭!!!

今日同媽咪行街,又有收獲,而且好抵,因為有折,$60一件仲平過花園街!!Yeah!!

================================================

今晚VC Re-U,相隔大半年終於搞得成,其實呢一晚VC亦有個alumni飯局,唔知盛況如何呢??

七點半多到達山林道一間樓上cafe,裝修都幾靚,而且地方幾大,仲有豆袋Cushion坐,環境唔坐!!差唔多到齊人後先開餐,不過d o野食都幾差,質素可能連自己整都不如,而且份量好少,我honey好唔夠飽!!!

我o地邊食邊互相交換近況,見到好多好耐無見o既中學同學仔,大部份都無乜點變,但都有幾位變o左好多呢!!!今晚成二十四人出席呀,吱吱喳喳很熱鬧,再之後就自己搵game玩,有的唱K有的玩NDS,鋤大D,Killer,多年無玩過killer了,唔少人都忘記點玩呢,哈哈!!!

時間不知不覺過去,話咁快十一點喎,真係唔覺呢,我仲掛住玩,唱o左好少歌,正同honey講話好想唱K時,Nata走過o黎話一齊唱K呀,正合心意呢!!

==============================================

十一點幾一行十四人拉大隊唱通宵K,但點知最後無通到,餓o左大半年無K唱o既我唱得好唔夠喉呀,但最衰Honey啦,叫我走,如果我知道其他人有順風車坐而我就要坐N車搖成個鐘先番到屋企,我真係寧願唱多兩個鐘等天光坐火車番去仲快,仲可以過多陣K癮呢!!!!

而家朝早六點,天都光晒,但我仲未眼訓,好耐未玩過通頂o既我估唔到仲咁有精力...仲略嫌未夠盡興添呢,哈哈!!!

===============================================

十一點起身,同尋日一樣時間,不過前晚一點訓,尋晚(今朝)就六點,唉...點解硬係唔可以訓耐少少,我真係從未試過訓到十二點一點o既滋味呢!!!